Oblys ákiminiń birinshi orynbasary Serik Aıdarbekovtiń tóraǵalyǵymen ótken jıynǵa ákimdiktegi jaýapty sala mamandary, departamentter, quqyq qorǵaý organdary, basqarma jáne tıisti mekeme basshylary, aýdan ákimderi, sondaı-aq selektorlyq rejımde aýyldyq okrýg ákimderi qatysty. Onda osy jyldyń 1 shildesinde kúshine enetin QR Ákimshilik rásimdik-prosestik kodekske sáıkes, ótinishterdi qaraýdy jetildirý maqsatynda jańa formatqa kóshý máselesi qaraldy.
«Qazir Atyraý qalasy men barlyq aýdanda servıstik ákimdik jumys isteýde. Sonymen qatar kodeks talaptaryn túsindirý boıynsha barlyq memlekettik qyzmetshi oqýdan ótip, tıisti sertıfıkattaryn aldy. «E-О́tinish» aqparattyq júıesine 213 memlekettik mekeme qosylyp, ótinishterdi óńdeý jumystary uıymdastyrylýda. Jalpy azamattardyń quqyqtaryn qorǵaý baǵytynda qabyldanǵan reformalardyń mańyzdylyǵyn eskere otyryp, aldaǵy ýaqytta bul jumystar ákimdiktiń tikeleı baqylaýynda bolady», dedi Serik Aıdarbekov.
Onyń aıtýynsha, turǵyndardan túsken ózekti ótinishter negizinen jer jáne turǵyn úı, jumyspen qamtý, áleýmettik kómek kórsetý, bilim berý men densaýlyq saqtaý máseleleri boıynsha tirkelgen.
Al, QR Prezıdenti Ákimshiliginiń О́tinishterdi qaraýdy baqylaý bóliminiń meńgerýshisi Tamara Dúısenova QR Ákimshilik rásimdik-prosestik kodeksine saı ótinishterdi jańasha qaraý tártibin jan-jaqty túsindirip berdi.
«Birinshi toqsanda Prezıdent Ákimshiligine 449 myńnan astam aryz túsken. Munyń ishinde 50 paıyzy jergilikti atqarýshy organnyń úlesine tıesili» deıdi Tamara Dúısenova.
Onyń málimetinshe, kodeks talaptaryna saı, buryn aryz 30 kún ishinde qaralatyn bolsa, endi 15 kúnde qaralatynyn jáne ár túsken aryzǵa ákimshilik is ashylady. Al, oblysta jyl basynan beri jergilikti atqarýshy organdarǵa 16 myńǵa jýyq ótinish túsip, onyń 20 paıyzy qanaǵattandyrylǵan. О́tinishterdiń qalǵanyna zańǵa sáıkes túsinikteme berilgen.
