Bolashaq polıseıler Penal Reform International uıymynyń Capstone Project jobasy aıasynda Nıderland Koroldigine baryp, sol eldegi sottalǵandar quqyǵynyń qorǵalýy men túrme júıesiniń damý barysymen, sondaı-aq adam quqyǵyn qorǵaý máselesimen tanysatyn bolady.
Atalmysh joba aıasynda Qostanaı akademııasynda ótken ǵylymı baıqaýǵa jalpy sany 21 kýrsanttan quralǵan 7 komanda qatysty. Olar arnaıy komıssııa músheleriniń aldynda «Alǵash ret sottalǵan áıelderdi psıhologııalyq beıimdeý», «Ekstremıstik jáne terrorıstik qylmystary úshin sottalǵandardy ońaltý», «Qazaqstanda sottalǵan sheteldikderdiń quqyqtary» taqyryptaryn qamtyǵan ǵylymı jumystaryn qorǵap shyqqan.
Qazylar alqasynyń tóraǵasy, Nıderland Koroldiginiń Qazaqstan Respýblıkasyndaǵy Elshilik mıssııasy basshysynyń orynbasary Arnaýt van Vaýndenberg myrzanyń aıtýynsha, «Qazaqstan Respýblıkasy men Nıderland Koroldigi quqyq qorǵaý salasynda ózara tıimdi yntymaqtastyq ornatqan.
«Bul joba kýrsanttarǵa adam quqyǵyn qorǵaý máselelerine qatysty zertteý jumystaryn halyqaralyq deńgeıde jalǵastyrýyna múmkindik beredi. Jas zertteýshiler halyqaralyq jáne jergilikti ýnıversıtetterdiń professorlarynyń jetekshiligimen jumys isteıtin zertteýshiler tobynyń quramynda bolady. Bul model álemniń eń úzdik joǵary oqý oryndarynda tabysty qoldanylýda», dedi elshilik ókili.
Halyqaralyq jobaǵa úmitker 7 komandanyń ishinen «Ekstremıstik jáne terrorıstik qylmystary úshin sottalǵandardy ońaltý» máselesi týraly ǵylymı jobany sátti qorǵap shyqqan Anastasııa Kırıchenko, Damılıa Baıjanova, Iýlııa Krıvıch syndy kýrsanttar toby jeńimpaz atandy. Úzdikter jaqyn arada Nıderlandqa attanady.
Bir aptalyq oqý sapary barysynda Penal Reform International uıymy baıqaý jeńimpazdarynyń Nıderland Syrtqy ister mınıstrliginiń, adam quqyǵyn qorǵaý jónindegi halyqaralyq uıymdardyń ókilderimen, penıtensıarlyq mekeme qyzmetkerlerimen kezdesýin uıymdastyrady. Sondaı-aq, qostanaılyq kýrsanttar jergilikti penıtensıarlyq mekemelerdi aralap, Beıbitshilik Saraıyna, Halyqaralyq qylmystyq sot keńsesine barady. Baıqaý jeńimpazdary, sonymen qatar, gollandııalyq joǵarǵy oqý oryndary sarapshylarynan dáris alatyn bolady. Kýrsanttardyń jeti kúndik bilim sapary Gaaga, Amsterdam, Ýtreht qalalarynda ótedi.
Qostanaı oblysy
