Osylaısha, álemdegi eń qymbat bılet 7 mınýttyń ishinde satyldy. Ázirge onyń ıesi kim ekeni belgisiz. Djef Bezos ıelik etetin Blue Origin kompanııasy juldyzy janǵan adamnyń aty-jónin aldaǵy birneshe aptada habarlaýǵa ýáde berip otyr.
Amazon-nyń negizin qalaýshymen birge ushýǵa álemniń 159 elinen 8 myńǵa jýyq úmitker qatysqan. Degenmen onlaın aýksıonǵa eń joǵary usynys jasaǵan 20 adam ǵana engen eken.
Aýksıon jeńimpazy Bezos jáne onyń inisi Markpen Batys Tehastaǵy Blue Origin ǵarysh aılaǵynda úsh kúndik daıyndyqtan ótkennen keıin ǵaryshqa ushady.
Blue Origin kompanııasy jospar boıynsha alǵashqy sapardy bıylǵy shildege josparlap otyr. Soǵan sáıkes, New Shepard ǵarysh kemesi alǵash ret aspan álemine adam alyp shyqpaq.
New Shepard kemesinde jolaýshylarǵa arnalǵan kapsýla bar. Sapar barysynda jolaýshylar 10 mınýt aspan áleminde bolady. Kapsýla jerden 104 kılometr bıiktikke deıin kóterilmek. Al jalpy sapardyń uzaqtyǵy 40 mınýtqa sozylmaq.
Tolyǵymen avtomattandyrylǵan kapsýlaǵa 6 jolaýshy syıady. Blue Origin-niń satý boıynsha jetekshi dırektory Arıan Kornell aýksıonnan keıin kemege kimderdiń naqty minetinin aldaǵy ýaqytta habarlaıtynyn jetkizdi.
Aıta keterligi, New Shepard-tyń ǵaryshqa ushyrylýy «Apollon-11» kemesiniń Aıǵa qonǵanyna 52 jyl tolýymen tuspa-tus kelip otyr. Aýksıonnan túsken qarajat Blue Origin’s for the Future klýbyna, ıaǵnı jastar arasynda ǵylym men tehnologııany nasıhattaýǵa berilmek.
Esersoq 4 aıǵa sottaldy
Fransııa prezıdenti Emmanýel Makrondy betinen shapalaqpen tartyp jibergen 28 jastaǵy jigit 4 aıǵa bas bostandyǵynan aıyryldy.
Sondaı-aq Damen Tarelge qosymsha 14 aı shartty jaza kesildi. Budan bólek, Tarelge bes jyl boıy memlekettik qyzmette bolýǵa jáne qarý ıelenýge tyıym salyndy.
Valans qalasynyń soty osyndaı sheshim shyǵardy. Tarel sotta óziniń ońshyl kózqarastaǵy adam ekenin, Makrondy Fransııadaǵy jaǵdaıdyń nasharlaýyna kináli dep sanaıtyndyqtan, qol kótergenin jetkizgen.
Fransııa prezıdentiniń baspasóz qyzmeti osy oqys oqıǵaǵa qaramastan, Makron halyqpen kezdese beredi dep málimdedi.
«Prezıdenttiń halyqpen betpe-bet júzdesýi – óte mańyzdy shara. Elimiz indetten qatty japa shekti. Biz daǵdarysty eńserip, ekonomıkamyzdy qalpyna keltirýimiz kerek. Al memleket basshysy sheshim qabyldaý úshin turǵyndarmen júzbe-júz tildesip, olardyń pikirin bilýi tıis», deıdi Fransııa prezıdentiniń baspasóz hatshysy Gabrıel Attal.
Esterińizde bolsa, ótken seısenbide E.Makron Drom departamentinde halyqpen kezdesýi kezinde oqys oqıǵa oryn alǵan-dy. Memleket basshysy kólikten shyǵyp, qorshaýmen bólingen turǵyndarmen kezdesý úshin bir top adamǵa jaqyndaıdy. Osy kezde bir er adam Makrondy qolynan ustap turyp, betinen shapalaqpen tartyp jibergen. Prezıdent kúzeti shapshań qımyldap, buzaqyny ustaǵan.
