Bıznes sýbektileriniń nysandaryna ornatylǵan Ashyq platformasy jaman tumaýdyń taralý qaýpin azaıtýdyń birden-bir tıimdi joly ekeni belgili. Oblys boıynsha jobaǵa qatysý úshin júzdegen ótinim túsip, onyń basym bóligi resmı rásimdelip, kásipkerlerge QR-kod berilgen.
– Búginde oblys ortalyǵynda 151 sýbekti Ashyq platformasy arqyly jumys istep tur, – deıdi Kókshetaý qalalyq kásipkerlik bóliminiń basshysy Andreı Podgýrskıı, – alǵashqy bette kásipkerler tarapynan túsinispeýshiliktiń bolǵany ras. Jańalyqqa jatyrqaı qaraıtyndar tabylady ǵoı. Biz olardyń basyn qosyp, ne úshin qajet ekendigin túsindirdik. Aldymen halyqtyń densaýlyǵyn saqtaý, daýasyz derttiń aldyn alý qajet. Ekinshi jaǵynan halyqqa qyzmet kórsetý deńgeıi kemimeıdi. Kásipkerler jańalyqtyń jaı-japsaryn jaqsy túsingennen keıin ótinimderin bere bastady.
Bólim basshysynyń aıtýyna qaraǵanda, Ashyq platformasy arqyly jumys isteıtin nysandardyń jartysynan astamy – qoǵamdyq tamaqtandyrý oryndary. Jańalyqtyń jaı-japsaryn, tıimdiligin kásipkerler de aıtyp otyr.
– Daýasyz derttiń dabyly jetkennen beri bizdiń salada jumys isteıtin kásipkerlerge ońaı bolǵan joq, – deıdi oblys ortalyǵyndaǵy «Barhat» dámhanasynyń ıesi Aısulý Bajaqova, – árqaısymyzdyń tóleıtin nesıelerimiz bar. Jumysymyz toqtap, sharýamyz qojyrap ketti. Tyǵyryqtan shyǵar joldyń biri osy jańalyq ekenin jete túsinip otyrmyz. Bir aıta keterligi, qoǵamdyq tamaqtandyrý oryndarynyń jumys isteýine ǵana emes, óńirdegi dertke tosqaýyl qoıýǵa septigi zor. Túıindeı aıtqanda, eki jaqqa da tıimdi.
Oblys ortalyǵyndaǵy birqatar kompıýterlik klýb, shashtaraz, monsha tárizdi qoǵamdyq oryndar osy platforma arqyly jumys isteýde.
– Bizdiń nysanǵa da platforma ornatyldy, – deıdi «Zevs» kompıýterlik klýbynyń dırektory Oljas Shaımurat, – qazir alańsyz jumys isteýdemiz. Halqymyzda «saqtansań saý bolasyń» deıtuǵyn qanatty sóz bar ǵoı. Klýbqa kelýshiler jazataıym indet juqtyryp alsa, qanshama qıyndyqty basynan keshirer edi. Endi mine, jaǵymdy jańalyqtyń nátıjesinde qaýip-qaterdiń aldyn alyp otyrmyz. О́z basym platformanyń tıimdiligi aýrýdyń aldyn alý dep esepteımin. Shynynda da bul –dert juqtyrmaýdyń birden-bir joly. Aldaǵy ýaqytta sıfrly platforma ár kásipkerdiń senimdi kómekshisi bolýy ábden múmkin.
Ashyq platformasy ornatylmaǵan nysandar shekteýli ýaqytta ǵana jumys isteıdi. Atalǵan qosymsha jalpy bazamen biriktirilgendikten, barlyq derek móldirep kórinip tur. Zamanaýı tehnologııanyń jetistigin óńirdegi kásipkerler kádege jaratýǵa ábden qulyqty. Kásibin jańa bastaǵandar da birden ótinimderin berip, tirkelýge asyǵýda.
Sóz arasynda platformanyń tıimdi ekenin dáleldeıtin bir mysaldy synalap keltire keteıik. Osy jańalyq arqyly oblys ortalyǵynda qoǵamdyq tamaqtandyrý oryndarynda «qyzyl» jáne «sary mártebesi» bar 12 kelýshi anyqtalyp, onyń tórteýinde PTR testiniń oń nátıjesi jáne 8-i qaýipti indetti tasymaldaýshylar ekeni anyqtalǵan. Mysaly, Kókshetaýdaǵy FamilyMood IPARTMOOD meıramhanasy men «Mıasorýbka» nysandary sııaqty qoǵamdyq tamaqtaný oryndarynda «qyzyl mártebesimen» birneshe adamnyń kelgeni anyqtalǵan. Mundaı oqıǵa Shýchınsk qalasyndaǵy «Iаgýar» fıtnes-ortalyǵy men Býrabaı kentindegi «Dostar» dámhanasynda da oryn alǵan. Osy bir mysaldan-aq qaýiptiń seıilmeı turǵandyǵyn, adamdardyń áli de beıqam ekendigin, jańalyqtyń paıdasyn ańǵarýǵa bolady.
