«Biz júıeli túrde jumys isteıtin máselelerdiń biri – áleýmettik turǵyn úıler qurylysy. Búgin Esil aýdanynyń Jaǵalaý shaǵyn aýdanynda ornalasqan birqatar qoljetimdi turǵyn úıdiń qurylysy qalaı júrgizilip jatqanymen tanystym.
Qurylys qarqynyn údetýdi, úılerdiń sapasyna jáne aınalasynyń abattandyrylýyna mán berýdi tapsyrdym. Budan buryn úılerdiń birinshi qabattaryn bızneske bermeı, turǵyndarǵa qajetti áleýmettik nysandar: ońaltý ortalyqtaryn, medısınalyq ortalyqtar, balalardyń bos ýaqytyn ótkizetin ortalyqtar, polısııa toraptaryn ashý týraly sheshim qabyldaǵanbyz», dep jazdy Altaı Kólginov.
Elorda ákiminiń aıtýynsha, Memleket basshysynyń tapsyrmasy boıynsha qoljetimdi turǵyn úıdi kóbirek salynýda. Mysaly, kezekte turǵandar úshin 2018 jyly 1800 áleýmettik páter salynsa, 2019 jyly – 2900, 2020 jyly 7 myńnan astam áleýmettik páter salynǵan. Bıyl erekshe suranystary bar balalardy ósirip otyrǵan analarǵa, múgedekterge, basqa da muqtaj jandarǵa arnap 10 myńnan astam páter salynady. Bul tizimge «Otbasy bankiniń» («Turǵyn úı qurylys jınaq banki») kezekte turǵan salymshylary da kiredi. Muqtaj jandarǵa jeńildikti páterler kilti jyl boıy tapsyrylady.
«Áleýmettik turǵyn úıler qalanyń barlyq aýdanynda, aıtalyq, Otaý, Jaǵalaý shaǵyn aýdandarynda, Sh.Qudaıberdiuly, R.Qoshqarbaev kóshelerinde, Prıgorodnyı turǵyn úı alabynda, jańa vokzal tóńireginde boı kóteredi», dedi qala ákimi.
Budan basqa, bıyl Elbasy bastamashylyq jasaǵan «Jumys isteıtin jastarǵa arnalǵan jalǵa beriletin turǵyn úı» baǵdarlamasy jalǵasady. Onyń aıasynda jyl sońyna deıin 1 myńnan astam jas baspanaly bolady. Buǵan qosa, jastarǵa arnalǵan arnaıy turǵyn úı baǵdarlamasy (áleýmettik nesıeleý) bastalady.
«Qala turǵyndarynyń turǵyn úı jaǵdaılaryn jaqsartý úshin Qazaqstan ıpotekalyq kompanııasy (KIK) jelisi boıynsha qatysatyndar sanaty keńeıtildi. Endi oǵan medısına qyzmetkerleri, pedagogtar, áleýmettik qyzmetkerler, órt sóndirýshiler, tártip saqshylary, mádenıet jáne sport qaıratkerleri qatysa alady. Sonymen birge turǵyn úı sertıfıkattarynyń somasy 1 mıllıonnan 1,5 mln teńgege deıin ulǵaıtyldy», dep jazdy elorda ákimi.
