Onyń barysynda 10-ǵa jýyq tegin konsert beriledi. Bul qoıylymdardy elorda turǵyndary men qonaqtary Mámbetov kóshesindegi «Affarı» bıznes ortalyǵynyń aldy men Ortalyq qalalyq saıabaqtaǵy amfıteatr sahnasynda ótkizedi. Sol sııaqty munda sheteldik ártister de óner kórsetedi dep josparlanyp otyr7
«Shyǵarmashylyq ujymymyz alǵash ret ashyq alańda óner kórsetkeli turǵan joq. Jyl saıyn Dj. Verdıdiń «Aıda» operasy syndy ǵalamat spektaklderdi ashyq aspan astynda oryndap júrmiz. Osyndaı jobalar aǵartýshylyq sıpatta jasalyp, qazaqstandyqtardy asqaq ónerge tartýǵa baǵdarlanǵan. Janǵa jaıly ári merekelik kóńil-kúı syılaımyz degen senimdemiz. Birqatar tosynsyı ázirledik. Munda Italııa, Shveısarııa, Japonııa, Reseı men Chehııadan kelgen sheteldik ártister óner kórsetedi», dedi «Astana Opera» teatrynyń dırektory, Qazaqstannyń eńbek sińirgen qaıratkeri Ǵalym Ahmedıarov.
Konsertterdiń baǵdarlamasy eresekterge de, balalar aýdıtorııasyna da qyzyqty bolatyndaı etip oılastyrylǵan. Jas kórermenderdi 13 jáne 19 maýsym kúnderi saǵat 12:00-de Affarı sahnasynda ótetin «Balalar syıǵa tartqan óner» atty konsert kútýde.
Al 13 maýsym saǵat 20:00-de Affarı sahnasynda ótetin «Vokaldyq mýzyka jaýharlary» konserti jeksenbilik keshtiń romantıkalyq áserin arttyra túspek.
Sonymen qatar Abzal Muhıtdınniń kórermenniń kóńilinen shyqqan «Jyldyń segiz mezgili» (A.Vıvaldı, A.Pıassolla) avtorlyq konserti 12-13 maýsym saǵat 20:00-de Ortalyq qalalyq saıabaqtaǵy amfıteatrda ótedi.
Al apta sońynda 26 jáne 27 maýsym kúnderi saǵat 20:00-de Ortalyq qalalyq saıabaqtaǵy amfıteatrda qala turǵyndarynyń nazaryna Opera-gala usynylmaq.
«Astana Operanyń» biregeı jobasy – «PICCOLO» teatry 5 shilde kúni saǵat 20:00-de qalalyq saıabaqta óz repertýarynyń injý-marjany – Gaetano Donısettıdiń «Don Paskýale» eki bólimdi drama-býffasyn usynady.
Elorda kúninde, ıaǵnı 6 shildede Ortalyq qalalyq saıabaqtaǵy amfıteatr sahnasynda merekelik gala-konsert ótedi, onda «Astana Opera» teatrynyń jetekshi opera solısteri, hor ártisteri men sımfonııalyq orkestriniń oryndaýynda qazaqstandyq avtorlar men batys eýropalyq klassık kompozıtorlardyń tanymal operalyq arııalary men dýetteri, aspaptyq ári horǵa arnalǵan shyǵarmalary shyrqalady.
