«Memleket basshysynyń tapsyrmasymen biz geologııa salasyn damytýdyń 2021-2025 jyldarǵa arnalǵan ulttyq jobasyn ázirleýge kiristik. Tolyq zerttelmegen shógindi basseınderdiń munaı-gaz áleýetin anyqtaý jáne taý-ken aýdandary shegindegi "tereń gorızonttardy zertteý kózdelip otyr. Jobany iske asyrý aýmaqty zertteýge, paıdaly qazbalardyń boljamdy resýrstaryn baǵalaýǵa múmkindik beredi. Sondaı-aq geologııalyq barlaý jumystary kezinde halyqty jumyspen qamtýǵa, ınvestısııalar tartýǵa jáne taý-ken baıytý kombınattaryn salý men paıdalaný kezinde jańa jumys oryndaryn qurýǵa múmkindik beredi. Bul óz kezeginde óńirdiń áleýmettik máselelerin sheshýge septigin tıgizedi», dedi Maǵzum Myrzaǵalıev halyqqa esep berý kezdesýinde.
Bıyl «Ulttyq mıneraldy resýrstar banki» aqparattyq júıesi paıdalanýǵa beriledi. Mınıstr atap ótkendeı, júıe ınvestorlardy tartýǵa múmkindik beredi.
«Geologııalyq aqparattyń elektrondyq bazasyna qol jetkizý memlekettik organdar men jer qoınaýyn paıdalanýshylardyń ózara qarym-qatynasyn sıfrlyq formatqa kóshirýge múmkindik beredi. 2020 jyly barlaý/óndirý, geologııalyq aqparatty satyp alýǵa lısenzııalar berý sekildi birqatar bıznes-prosester ázirlendi, memlekettik derekter bazasymen ıntegrasııalar júrgizildi», dedi ol.
