Ulttyq ulannyń «Batys» óńirlik qolbasshylyǵy baspasóz qyzmetiniń aqparatyna qaraǵanda, 13 maýsymda keshki saǵat 22:30-da Atyraý qalalyq jedel basqarý ortalyǵyna joǵalǵan balalardyń analary habarlasqan. Olar kórshilerimen oınaýǵa shyqqan balalarynyń úıine oralmaǵanyn aıtypty.
«Joǵalǵan balalar týraly aqparat quqyq qorǵaý organdarynyń barlyq jeke quramyna berildi. Patrýl bastyǵy Nazar Izbasov pen quramynda patrýldik qatardaǵy sarbazdar Azamat Ismaılov pen Bekbolat Beısenbaev bar áskerı narıad «Jeńis» saıabaǵynyń janynda júrgen tórt balany baıqaǵan. Olar joǵalǵan balalardyń sıpattamasyna uqsas bolǵan. Al, Azamat, Azat, Raýan jáne Danıl esimdi balalar oınap júrip, úıinen alystaǵanyn ańǵarmaǵanyn aıtqan», dep habarlady qolbasshylyqtyń baspasóz qyzmeti.
Ulttyq ulannyń sarbazdary jedel basqarý ortalyǵy arqyly balalardy ata-analarymen tabystyrdy. Qoǵamdyq tártipti saqtaý jónindegi áskerı mindetin oryndaý kezinde qyraǵylyq kórsetken sarbazdarǵa №5546 áskerı bólim komandıriniń alǵysy jarııalandy.
