Sankt-Peterbýrgtegi «Gazprom Arenadaǵy» saıysty 24 540 kórermen tamashalady. V tobyndaǵy básekeniń bastalǵanyna nebári eki mınýttaı ýaqyt ótkende, Ioel Pohıanpalonyń baspen urǵan doby qaqpa torynan tabyldy. Alaıda tóreshi VAR júıesine súıene otyryp, doptyń ofsaıdtan soǵylǵanyn anyqtady. Osydan keıin-aq reseılikter qarqynyn kúrt kúsheıtti. Alǵashqy týrda Belgııadan oısyraı utylǵan olar bul joly qalaı da úsh upaı oljalaýdy kózdedi. Sol sebepti de damylsyz shabýyldady. Desek te jankúıerler torda týlap jatqan dopty tek úziliske shyǵar sátte ǵana kóre aldy. Bul goldyń avtory – Alekseı Mıranchýk.
Ekinshi kezeńde Reseı quramasynyń sapyndaǵy Aleksandr Golovın, Rıfat Jemaletdınov jáne Artem Dzıýbanyń tepken doptary qaýipti boldy. Sýomı eliniń saıypqyrandary arasynda Teemý Pýkkı óte belsendi oınady. Biraq olardyń eshqaısysy tablodaǵy esepti ózgerte alǵan joq – 0:1.
Bakýdegi «Olımpııskıı» stadıonynda Túrkııa men Ýels sheberlik baıqasty. Tusaýkeser kezdesýinde ıtalııalyqtardan ońbaı jeńilgen Anadoly eliniń ókilderi bul básekede baryn salady dep úmittendik. О́ıtkeni óz oıynshylaryna qoldaý kórsetý maqsatynda irgedegi Túrkııadan Kaspıı teńizi jaǵalaýyna san myń jankúıer arnaıy at basyn burdy. Jáne de ázerbaıjan halqy da óz baýyrlastarynyń shashbaýyn kóteredi. Al jankúıerlerdiń qoldaýy qaı kezde de komandany erekshe jigerlendirip, qanattandyratyny anyq.
HHI ǵasyrdyń alǵashqy onjyldyǵynda Shenol Gıýnesh pen Fatıh Terım syndy bilikti bapkerler Túrkııa quramasynyń tizginin ustaǵany belgili. Maıtalman mamandardyń jetekshiligimen aıtýly memlekettiń aıaqdop sheberleri álem men Eýropa chempıonaty jáne Konfederasııa kýbogynda tórtkúl dúnıeni tamsandyryp, qola medaldy oljalady. Sol kezderi Hahan Shúkir, Hasan Shash, Rıýshtıý Rechber, Bıýlent Qorqymaz, Iyldyraı Bastúrik, Úmit Davala, Ilhan Masyz jáne taǵy basqa oıynshylardyń esimderin estııar baladan, eńkeıgen qartqa deıin jatqa biletin. Bul joly da tizgin dańqty Gıýneshtiń qolynda edi. Biraq biz múlde basqa Túrkııany kórdik. Áıgili komandanyń qańqasy da qalmapty. Ýelske qarsy oıynda soǵan anyq kóz jetkizdik. Túrikter ne bir jaqsy shabýyl, ne bir kóńilge qonymdy kombınasııalar uıymdastyra almady. Nátıjesinde, olar taǵy da jeńilistiń kermek dámin tatty. Esep – 0:2. Bul goldardyń avtorlary – Aaron Remsı (42-mınýt) men Taıler Roberts (92-mınýt).
A tobynda Italııa quramasy jeke-dara kósh bastady. Alǵashqy týrda Túrkııany 3:0 esebimen tize búktirgen olar kelesi kezdesýde óte keremet oıyn órnegin kórsetip, iri eseppen jeńiske jetti. Bul joly Apennın túbeginiń túlekteri Shveısarııa fýtbolshylarynyń tas-talqanyn shyǵardy. Tablodaǵy esep taǵy da – 3:0.
Rımde ótken matchtyń 19-mınýtynda Djordjo Kellını esep ashty. Biraq sol epızodty qaıtalap kórgen reseılik tóreshi Sergeı Karasev soǵylǵan goldy esepke almady. Desek te odan keıin de alań ıeleri qarqynyn báseńdetken joq. Janushyra alǵa umtylǵan ıtalııalyqtar kózdegen maqsattaryna qol jetkizdi. Básekeniń 26 jáne 52-mınýttarynda Manýel Lokatellı eki márte nysanany dál kózdese, 89-mınýtta Chıro Immobıle kezdesýdiń sońǵy núktesin qoıdy.
