Táýelsizdik jyldarynda bul aýdan burynǵy «Qyzyl tý» aýdanynyń negizinde qurylǵan. Qazaqtyń tuńǵysh ǵalymy Shoqan Ýálıhanovtyń bul óńirge qatysy bolmasa da aýdan burynǵy Kókshetaý oblysyna qaraǵandyqtan oǵan ǵalymnyń esimi berilgen. Aýdan aýmaǵy Pavlodar, Aqmola jáne Reseıdiń Omby oblysymen shektesedi. Halqynyń 90 paıyzdan astamy – ózimizdiń qarakózder. Aýdannyń jalpy jer kólemi 12,9 myń sharshy shaqyrym nemese 1 mln 290 myń ga. Sonyń 203 myń ga jerine ǵana aýyl sharýashylyǵy daqyldary egiledi. Al qalǵany – negizinen jaıylym. Sondyqtan munda mal sharýashylyǵyn damytý tıimdi. Bıyldyń alǵashqy toqsanynda munda 891 tonna et óndirilgen. Byltyrdyń sáıkes merzimimen salystyrǵanda bul 3,5 paıyzǵa artyq. Sút saýý 2,6 paıyzǵa, jumyrtqa 1,6 paıyzǵa artqan. Aýdan ákimi Qaırat Pishembaevtyń aıtýyna qaraǵanda qazir osy salanyń damýy qaryshtap alǵa basyp keledi. Tek bıyl ǵana aýdandaǵy fermerlik sharýashylyqtar 190 tuıaq asyl tuqymdy qara mal satyp alǵan.
«Mal sharýashylyǵyn damytý jónindegi Jol kartasyn iske asyrý aıasynda úlken ınvestısııalyq jobalardy júzege asyrý josparymyzda bar. Jalpy somasy 6,8 mlrd teńgege 7 ınvestısııalyq joba iske qosylady dep kútilýde. Atalǵan jobalar arqyly 7 myń 600 bas mal satyp alynbaq. Bul 2020 jylmen salystyrǵanda 20 ese kóp», dedi ákim.
Agrarlyq nesıe korporasııasynyń kómegimen Aqbulaq aýylynda alǵashqy bordaqylaý alańyn iske asyrý qolǵa alynǵan. Jobanyń jalpy quny 1 mlrd teńge, qýattylyǵy jylyna 15 myń tonna et óndiriledi. О́tken jyly 100 basqa arnalǵan alǵashqy sút-taýar fermasy Qýlykól aýylynda iske qosylǵan eken. Bıyl osyndaı ferma Kishkenekól aýylyndaǵy «Joldasbaı Agro» fermerlik sharýashylyǵynda iske aspaq. Onda 1200 basqa arnalǵan sút-taýar fermasynyń qurylysy salynyp, jumys isteıdi. Jobanyń qýattylyǵy jylyna 6 myń tonna sút óndirý. «Aýdanymyzda mal sharýashylyǵyn tıimdi damytý úshin barlyq jaǵdaılar bar. Memlekettiń qoldaýymen salany damytý boıynsha qajetti jumystar ári qaraı jalǵasady», deıdi Qaırat Sákenuly.
Shalǵaı aýdan bolǵandyqtan munda jaqsy avtojol zárýligi – úlken problemanyń biri. Ekonomıkanyń qan aınalysyn arttyratyn joldardyń mańyzy aıtpasa da belgili. 2020 jyly munda joldardyń jóndelý qarqyny joǵary bolyp, burynǵy oıylyp qalǵan joldardyń 20 paıyzy jaqsy jáne qanaǵattanarlyq deńgeıge jetkizilgen. Buǵan 622 mln teńge jumsaldy, al bul 2019 jylǵa qaraǵanda 93 paıyzǵa artyq edi. Demek byltyr jol jóndeýge bólingen qarajat odan arǵy jyldan eki esege jýyq kóp. Bıyl tek aýdan ortalyǵy Kishkenekól aýylynyń uzaq jyldar boıy shashyrap jatqan joldaryn jóndeýge 340 mln teńge bólingen. Budan basqa aýdanishilik joldardy jóndeýge 1 mlrd teńgeni qajet etetin 12 jobalyq-smetalyq qujattar daıyndalyp qoıǵan. Eger osynsha qarajat bólinetin bolsa, aýdan joldarynyń 75 paıyzy jaqsartylyp, turǵyndardyń rızashylyǵyn alar edi.
Aýdannyń basqa salalarynda da oń ózgerister bar. Qazir Ýálıhanov aýdany burynǵyǵa qaraǵanda kósh ilgeri qarqynmen damyp keledi. Oǵan oblysqa Prezıdenttiń qoldaýymen bekitilgen áleýmettik-ekonomıkalyq damýdyń Ekinshi keshendi josparynyń shapaǵaty molynan tıip jatyr. Eldiń sheti jaqsara bastasa basqasy da qalmasy anyq.
