«Bizdiń óńir úshin ózekti máseleniń biri – ekologııalyq ahýal. Jyl basynan beri ǵaryshtyq monıtorıng arqyly Atyraý qalasynyń aýmaǵynan 94 zańsyz qoqys orny anyqtaldy. Onyń 39-y tazalandy, 42-sinde tazalaý jumystary júrgizilýde. Al, qalǵan 13 qoqys ornynyń ıeleri anyqtalýda. Byltyr oblys ortalyǵynda 484 tirkelmegen qoqys orny anyqtalyp, barlyǵy joıylǵan», deıdi Mahambet Dosmuhambetov.
Ákimniń málimetinshe, Prezıdenttiń 2025 jylǵa deıin orman alqabynda jappaı tal egý men eldi mekenderdi kógaldandyrý tapsyrmasyna sáıkes aýqymdy jumystar bastaldy.
«Aldaǵy bes jylda oblystyń orman qorynyń alqabyna 7 mıllıon kóshet, al eldi mekenderge 540 myń tal egý josparlanyp otyr. О́ńirdegi «Teńizshevroıl», NCOC, AMО́Z jáne «Embimunaıgaz» syndy iri munaı-gaz kásiporyndarymen kógaldandyrý jumystaryna qatysty memorandým jasaldy. Olar osy kúzde jumysty bastaıdy», deıdi ákim.
