Mamandar qant dıabeti, júrek talmasy, qan qysymy sııaqty syrqat belgileri anyqtalǵan adamdarǵa aýrýdyń aldyn alý týraly aqyl-keńesterin berip, ekpe jasatý kerek ekenin qadap eskertti. Vaksınany kóshpeli medısınalyq pýnktten 100 metrdeı jerdegi «Bıznes ortalyǵynda» qabyldaýǵa bolady. Eńseli ǵımarattyń bir bólmesinde birazdan beri arnaıy jabdyqtalǵan ekpe jasatý kabıneti ashylǵan. Mundaǵy dárigerler turǵyndardyń óz qalaýy boıynsha Spýtnık V, QazVac nemese Hayat-Vax vaksınasyn egip jatyr.
«Dáriger qabyldaýy» aksııasynyń basty maqsaty – qala turǵyndarynyń densaýlyǵyna qaýip tóndirip turǵan syrqat belgilerin anyqtaý. Ádette kúndelikti kúıbeń tirshilikke kóbirek mán berip, jumysbasty bolyp ketken azamattardyń kóbi óz densaýlyǵyna qaraýdy esten shyǵaryp jiberedi. Aýrýyn ábden asqyndyryp, sosyn ǵana emhanaǵa kelip jatatyn adamdar jıi kezdesedi. Jaman aıtpaı, jaqsy joq, dert asqynyp ketse, onyń arty jaqsylyqqa aparmaıdy. Esterińizde bolsa, bıyl 1 aqpannan bastap turǵyndarǵa vaksına egý bastalǵan. Dál qazirgi kezeńde Qostanaı oblysynda vaksınanyń úsh túri bar», dedi №1 qalalyq emhananyń bas dárigeri Janat Álmaǵambetova.
Bas dárigerdiń sózinshe, búginde óńirde Sovid-19-ǵa qarsy vaksınalaý sharasy belsendi júrip jatyr. Oblys ortalyǵynda emhanalardyń syrtynda, halyq jıi baratyn qoǵamdyq oryndarda vaksına egý kabınetteri kóptep ashylýda. Oblys turǵyndaryna qazir 31 medısınalyq mekeme ekpe jasap jatyr, onyń beseýi – jekemenshik. Munyń syrtynda, 93 stasıonarlyq jáne jyljymaly nysan belsendi jumys isteýde. Qajet bolǵan jaǵdaıda bulardyń sanyn 150-ge deıin kóbeıtýge múmkindik bar. О́ńirde barlyǵy 426 medısına qyzmetkeri ekpe jasaýmen aınalysýda. Olardyń bári – arnaıy oqý kýrstarynan ótken bilikti mamandar.
Qostanaı oblysy
