Otyrysta Úkimet pen Esep komıtetiniń 2020 jylǵa arnalǵan respýblıkalyq bıýdjettiń atqarylýy týraly esepteri qaralady.
Aıta keteıik, atalǵan esepter osyǵan deıin Májilis pen Senattyń jalpy otyrystarynda talqylanǵan bolatyn. 2020 jyly respýblıkalyq bıýdjettiń atqarylýy jahandyq daǵdarysqa baılanysty iskerlik belsendiliktiń aıtarlyqtaı tómendeýi jaǵdaıynda júzege asyryldy. Qarjy mınıstrliginiń málimetinshe, jalpy ishki ónim naqty 2,6 paıyzǵa tómendedi. Bul negizinen karantındik sharalardyń engizilýinen qyzmetter kórsetýdiń 5,4 paıyzǵa tómendeýine baılanysty boldy. Degenmen ekonomıkanyń naqty sektory 2 paıyzǵa óskenin kórsetti.
Bıýdjettiń basym baǵyttary tótenshe jaǵdaı kezinde azamattardy jáne naqty sektordy qoldaýǵa arnalǵan shyǵystar boldy. Bul - áleýmettik tólemderdi ındeksteý, shaǵyn jáne orta bıznes sýbektilerine salyq aýyrtpalyǵyn tómendetý, «Jumyspen qamtý jol kartasy», «Bıznes jol kartasy», «Eńbek» jáne basqa da baǵdarlamalar.
Bıýdjet túsimderi 100,3 paıyzǵa oryndalyp, 12 trln 49 mlrd teńgege jetti. Shyǵystar 98,3 paıyzǵa ıgerildi jáne 14 trln 234 mlrd teńgeni qurady. Áleýmettik shyǵystar 2019 jylmen salystyrǵanda 1,4 trln teńgege ulǵaıyp, 6,6 trln teńgeni qurady.
Bul respýblıkalyq bıýdjettiń jalpy kóleminiń 47 paıyzy. Parlament palatalarynyń birlesken otyrysy onlaın-formatta kórsetilip jatyr.
