«О́tken jyly iskerlik baılanystar men seriktestikke tyń serpin beretin aımaqtyq dıplomatııalyq ózgeriske kýá boldyq. Dýbaı Medıa Sıtıde keńsemizdiń ashylýy Taıaý Shyǵys máselelerin aımaqtyq medıa ındýstrııasynyń ortalyǵynan taratýǵa jol ashatyn strategııalyq alań qalyptastyrýǵa múmkindik beredi», dedi i24News-tiń bas dırektory Frenk Mello.
Sonymen qatar Birikken Arab Ámirlikterimen birqatar kelisim jasalǵan. Máselen, aǵylshyn tilinde shyǵatyn Gulf News gazetimen kontent almasady. BAÁ Týrızm mınıstrliginiń jarnamalary jarııalanady.
Dýbaı medıa-ofısiniń bas dırektory Mona ál-Marrı BAÁ men Izraıldiń medıa sektorlary arasyndaǵy yntymaqtastyqtyń ornaǵanyn quptady. Dubai Media City kompanııasynyń dırektory Majed ál-Sývaıdıdiń aıtýynsha, i24News-pen kelisim jasasý medıa ókilderiniń aıasyn keńeıtedi.
i24News arnasynyń jańalyqtaryn Etisalat jáne DU baılanys operatorlary taratpaq. Arna arab, aǵylshyn jáne fransýz tilderinde habar taratady. Byltyr jeltoqsanda Tel-Avıv qalasynda ornalasqan i24News Ábý-Dabı Medıamen kelisimshart jasasyp, ortaq aqparat taratý, muraǵat materıaldaryn bólisý jóninde ýaǵdalasty.
Budan bólek, BAÁ bıligine tıesili Dubai Media Incorporated kompanııasy i24News-ben kontent jasaý, medıa-tehnologııalar jáne qyzmetkerlermen almasý baǵdarlamalary boıynsha yntymaqtastyq týraly memorandýmǵa qol qoıǵanyn málimdedi.
Taıaý Shyǵystaǵy bul jylymyq byltyr bastalǵan. AQSh-tyń araǵaıyndyǵymen «Abraham kelisimine» qol qoıyldy. Soǵan sáıkes, Izraıl BAÁ, Bahreın, Marokko elderimen dıplomatııalyq baılanys ornatty. Bıyl bul tizimge Sýdan qosyldy. Buǵan deıin arab elderiniń ishinde Mysyr pen Iordanııa ǵana Izraılmen dıplomatııalyq baılanys ornatqan edi.
Palestınalyqtar bul kelisimge narazylyq bildirip otyr. Olardyń aıtýynsha, qarym-qatynasty qalypqa keltirý Arab lıgasynyń ustanymyna qaıshy keledi. Onda Izraıl tarapy Palestına jerlerin basyp alýdy toqtatpaıynsha jáne táýelsiz Palestına memleketimen kelisim jasamaıynsha, atalǵan elmen qarym-qatynas bolmaýy kerek ekeni aıtylǵan.
Eýroodaqtyń erejesi synǵa ushyrady
Sarapshylardyń paıymdaýynsha, Eýropalyq odaqtyń hımııalyq zattarǵa qatysty jańa erejesi polımerlerdiń kópshiligin tekserýsiz paıdalanýǵa múmkindik bermek.
Eýropadaǵy hımııalyq erejelerge sáıkes, 200 000-ǵa jýyq polımer túriniń 6 paıyzy Eýropada qaýipsizdikti tekserýdi qajet etedi. Osyǵan baılanysty 19 ǵalym Eýropalyq Komıssııaǵa hat joldady.
Olardyń aıtýynsha, bul – óte az kórsetkish. Plastık zattar qorshaǵan ortaǵa zııan. Soǵan qaramastan, jańa erejeler polımerlerdiń kóptegen túrin erkin qoldanýǵa múmkindik beredi.
Eýropalyq ekologııalyq bıýronyń keltirgen málimetterine súıensek, tekserýdi qajet etpeıtin hımıkattardyń qataryna qaýipti túrleri de enip ketken. Máselen, polıstırol egeýquıryq ókpesiniń qabynýyna sebep bolǵan. Sondaı-aq qaldyq sýlardy, jelimderdi jáne tamaq oramalaryn tazartýda qoldanylatyn akrılamıd monomeri neırotoksınge aınalatyn polıakrılamıdter de tizimge engen.
Taıaýda Eýropalyq Komıssııa osy máselege qatysty zertteýge tapsyrys bergen edi. Soǵan súıensek, keı plastıkalyq zattardy qatań tekserýden ótkizbese, qorshaǵan ortaǵa orasan zııan keltiredi.
Eýropalyq Komıssııa usynystar bastapqy satyda ekenin, áli de talqylaý jalǵasatynyn aıtyp otyr. «Endigi jıynda polımerlerdi qalaı tirkeýdiń keıbir tehnıkalyq aspektileri talqylanady, biraq polımerlerdiń qalaı tirkelýiniń túpkilikti nátıjeleri ázirge talqylanbaıdy jáne erejeler jobasy joq», deıdi Eýropalyq komıssııanyń baspasóz hatshysy.
Árbir júzinshi turǵyn – bosqyn
Planetanyń árbir júzinshi turǵyny – bosqyn. Olardyń sany sońǵy onjyldyqta eki esege ósken. Qazirgi tańda bosqyndar sany 82 mıllıonnan asyp ketti.
BUU esebinde mıgranttardyń kóp bóligi «ishki qonys aýdarýshylar», ıaǵnı óz elderinde bosqyndarǵa aınalǵandar ekeni atap ótilgen. BUU-nyń bosqyndar isi jónindegi joǵarǵy komıssary Fılıppo Grandıdiń aıtýynsha, kóshi-qon máselelerine qaraǵanda, ishki qonys aýdarýshylar túıtkilderin sheshý qıyn, óıtkeni olar qarýly qaqtyǵys jaǵdaıynda tirshilik keship jatyr.
«Iemen týraly, Tıgraı týraly, Aýǵanstan týraly oılańyz. Trendtiń, odan ári ósý tendensııasy bar Bul bizdi qatty alańdatady. Osy esepte ishki qonys aýdarýshylar sany shamamen 50 mıllıonǵa jýyqtady», deıdi ol.
Bosqyndardyń kópshiligi – sırııalyqtar. Olardyń sany 6,8 mıllıonǵa jetken. Ekinshi orynda – palestınalyqtar, úshinshi orynda – venesýelalyqtar. Budan bólek, Ońtústik Sýdan jáne Mıanma elderiniń azamattary da bosyp júr. Qazirgi tańda aty atalǵan bes eldiń azamattary álemdegi bosqyndardyń úshten ekisin quraıdy. Bir ókinishtisi, shartaraptaǵy mıgranttardyń 42 paıyzy kámeletke tolmaǵan balalar.
