Astana kúnin merekeleý aıasynda 4 shilde kúni saǵat 18:00-de teatrdyń Úlken zaly sahnasynda «Astana Opera» Halyqaralyq opera akademııasynyń ashylýyna oraı saltanatty Gala-opera ótedi. Konsertke Marıandjela Sısılııa, maestro Djýzeppe Akýavıva, Franchesko Melı, Mattıa Rossı (Italııa), Lıbýshe Santorısova (Chehııa), Alekseı Shapovalov (Reseı), Badral Chýýlýnbaatar (Mońǵolııa), Saıan Isın (Qazaqstan-Qyrǵyzstan), Baýyrjan Ánderjanov (Germanııa-Qazaqstan), Medet Chotabaev, Jupar Ǵabdýllına, Saltanat Ahmetova (Qazaqstan) sekildi álemdik ári qazaqstandyq óner juldyzdary qatysady.
Oryndaýshylardyń juldyzdy quramy Ortalyq qalalyq saıabaqtaǵy Amfıteatr sahnasynda da óner kórsetedi. «Astana Opera» teatry Mádenıet jáne sport mınıstrligi jáne Nur-Sultan qalasynyń ákimdigimen birlesip, 5 shilde kúni saǵat 20:00-de Gaetano Donısettıdiń eki bólimdi «Don Paskýale» operasyn usynady. Basty partııalardy oryndaýshylar: Norına – Lıbýshe Santorısova (Chehııa), Ernesto – Esýo Doı (Japonııa), Malatesta – Alekseı Shapovalov (Reseı), Don Paskýale – Antýan Bernheım (Shveısarııa), Karlıto – Erulan Kámel. Dırıjer – Korrado Valvo (Italııa).
«Bul – osyndaı daryndy halyqaralyq ánshiler quramymen alǵashqy yntymaqtastyǵym. Ashyq aspan astynda óner kórsetý kezinde eń qıyny – ánshiler men orkestr arasyndaǵy teńgerimdi tabý. О́z basym operalyq spektaklder úshin ıtalııalyq stıldegi teatrdy qup kóremin, biraq jaz mezgilinde bizde Italııada opera sahnasy retinde qoldanylatyn ejelgi grek jáne ejelgi rım teatrlary bar. «Don Paskýale» – G.Donısettıdiń keremet áýezdi konstrýksııalarǵa, áserli dramatýrgııalyq qurylymǵa, keıipkerlerdiń psıhologııalyq jáne patetıkalyq tereńdigine ıe pisip-jetilgen shyǵarmasy. Bul – stılıstıkalyq tutastyqqa qurylǵan jańa romantıkalyq sezimtaldyqtyń nátıjesi. Osynyń bári Donısettıdi Verdıdiń uly izashary ári on toǵyzynshy ǵasyrdyń birinshi jartysyndaǵy uly ıtalııalyq opera kompozıtorlarynyń biri etedi», dedi maestro Korrado Valvo (Italııa).
6 shildede Ortalyq qalalyq saıabaqtaǵy amfıteatr sahnasynda ótetin merekelik Gala-konsertke teatrdyń jetekshi opera solısteri, hor ártisteri men sımfonııalyq orkestrdiń oryndaýynda qazaqstandyq avtorlar men batyseýropalyq klassık kompozıtorlardyń tanymal operalyq arııalary men dýetteri, aspaptyq ári horǵa arnalǵan shyǵarmalary shyrqalady.
Merekelik 6 jáne 7 shilde kúnderi «Astana Opera» Úlken zalynyń sahnasynda afıshaǵa eki birdeı qoıylym – «Kúmis ǵasyr baletteri» toptamasynan M.Fokınniń horeografııasyndaǵy F.Shopenniń mýzykasyna «Shopenıana» men N.A.Rımskıı-Korsakovtyń mýzykasyna «Sheherezada» bir bólimdi baletteri engizildi.
