1992 jyly 23 maýsymda Qazaqstan Respýblıkasy Joǵarǵy Keńesi «Qazaqstan Respýblıkasy ishki ister organdary týraly» Zańdy qabyldaǵan bolatyn.
Bul Táýelsiz Qazaqstan Respýblıkasy polısııasynyń qyzmeti men mindetin anyqtaıtyn alǵashqy quqyqtyq akt boldy.
Al 2007 jyly 5 maýsym kúni Memleket basshysy Nursultan Nazarbaev óz Jarlyǵymen 23 maýsymdy Polısııa kúni dep bekitti.
Qazaqstan polısııasy – qoǵamdaǵy quqyqtyq tártipti, azamattardyń qaýipsizdigin qamtamasyz etetin elimizdegi asa mańyzdy qurylymdardyń biri. Polıseılerdiń kásibı biliktiligi men sertine beriktiginiń arqasynda qoǵamda turaqtylyq qalyptasyp, adamdardyń quqyq qorǵaý organdaryna senimi arta beredi.
Qazaqstan polısııasy kúni - osy jaýapty qyzmetti jolǵa qoıýdyń basy-qasynda bolǵan ardagerlerge jáne búginde osy qatarda eńbek etip júrgenderge rızashylyq pen alǵys sezimin bildirý kúni.
Sonymen qatar bul kún beıbit ýaqytta qazaqstandyqtardyń tynyshtyǵy men qaýipsizdigi úshin óz ómirin qurban etkenderge qurmet kórsetý kúni sanalady.
Osyǵan oraı jyl saıyn 23 maýsymda beıbit kúnde qazaqstandyqtardyń tynyshtyǵy men qaýipsizdigin qamtamasyz etetin polıseıler kúni atap ótiledi.
