Qazaqstan Respýblıkasy Táýelsizdiginiń 30 jyldyq mereıtoıy jáne Qazaqstan polısııasy kúnine oraı, Q. Qýanyshbaev atyndaǵy memlekettik akademııalyq qazaq mýzykalyq drama teatrynda Ulttyq ulan Án-bı ansambliniń «Jeńis jalaýy» spektakliniń tusaýkeseri ótti. Atalǵan týyndy Uly Otan soǵysynyń qaharman batyry, Reıhstagqa Jeńis alǵash týyn tikken Raqymjan Qoshqarbaevtyń erligine negizdelgen.
Sonymen birge sahnada tuńǵysh ret elimizdiń kúsh qurylymdary arasynda Ulttyq ulan Án-bı ansambli teatrlyq tobynyń ártisteri óner kórsetkenin erekshe atap ótken jón. Spektakl tusaýkeserine Mádenıet jáne sport mınıstri Aqtoty Raıymqulova, Ishki ister mınıstriniń basshylyq quramy, Ulttyq ulan Bas qolbasshysy Rýslan Jaqsylyqov, Parlament depýtattary men ardager generaldar, óner jáne mádenıet qaıratkerleri, áskerıler, sondaı-aq buqaralyq aqparat quraldarynyń ókilderi qatysty.
О́z sózinde Mádenıet jáne sport mınıstri Aqtoty Raıymqulova óner ujymyn áskerı teatrdyń ashylýy jáne qoıylymnyń tusaýkeserimen quttyqtady. Ulttyq ulan Bas qolbasshysy general-leıtenant Rýslan Jaqsylyqov aıtqandaı, qoıylymdy qoıýdaǵy maqsat – el halqy men óskeleń urpaqqa Raqymjan bastaǵan qazaq jastarynyń Uly jeńisti jaqyndatýǵa qosqan úlesin, olardyń maıdan dalasyndaǵy erligin áspetteý bolyp tabylatynyn jetkizdi.
Sonymen qatar Rýslan Fatıhuly ansambl quramyndaǵy teatr toby Ishki ister mınıstriniń qoldaýymen ashylǵanyn, ony qurý barysynda reseılik ásker teatrynyń tájirıbesi zerttelgenin aıtty. Áskerı teatrdy ashýdaǵy maqsat – pogon taqqan ártisterdiń óneri arqyly óskeleń urpaqty patrıotızmge baýlý, sondaı-aq áskerı qyzmetti nasıhattaý bolyp tabylady.
Spektakldiń mazmunyna qysqasha toqtalar bolsaq. Elimizdiń birtýar batyry Baýyrjan Momyshuly jazýshy-jýrnalıst Kákimjan Qazbaevty ózine shaqyryp, Reıhgstagqa alǵash Tý tikken qazaq Raqymjan Qoshqarbaev týraly zertteý jasaýdy buıyrady. Jeńis jalaýyn qadaǵan jas jigittiń erligin zerttegen jazýshy onyń ómirimen egjeı-tegjeıli tanysady. Sol sátten bastap sahnada jas Raqymjannyń soǵysqa deıingi ómiri kórermenderdiń nazaryna usynyldy. Bolashaq qaharmannyń armany, mahabbaty, jigeri men ór rýhy qamtyldy.
Uıymdastyrýshylar bas qaharman arqyly Otanǵa degen rııasyz súıispenshiligin sátti kórsete aldy. Eń bastysy, Reıhstagqa Tý tikken erligi baıandaldy. Qoıylym barysynda urpaqtar sabaqtasytyǵy men patrıotızm rýhyn sińirgen áskerı jáne soǵys jyldaryndaǵy ánder aıtyldy. Bul qoıylymǵa erekshe reń syılaıdy. Er Báýkeń – Baýyrjan Momyshuly tarıhı shyndyq úshin kúreskeni, Rahymjan Qoshqarbaevqa «Keńes Odaǵynyń batyry» ataǵyn berý týraly talaby kórsetiledi.
Qoıylym sońynda Elbasy N. Nazarbaevtyń Jarlyǵymen Raqymjan Qoshqarbaevqa 1999 jyly «Halyq Qaharmany» ataǵy berilgeni aıtyldy. Bul tarıhı shyndyqqa umtylǵan halyqtyń Raqymjandaı batyry arqyly tebirenisin jáne Elbasy men egemendiktiń atalǵan shyndyqqa jetýdegi rólin kórsetkenin atap ótken jón.
Aıta ketý kerek, spektakl Ulttyq ulan Án-bı ansambliniń teatrlandyrylǵan tuńǵysh qoıylymy boldy. Áskerı drama janryndaǵy qoıylymnyń avtory Qanat Júnisov, qoıýshy rejısseri Dáýren Serǵazın, qoıýshy sýretshisi Erlan Tuıaqov, Án-bı ansambliniń kórkemdik jetekshisi maıor Darhan Rahymǵalıev. Ulttyq ulan Án-bı ansambli búgingi tańda memleketimizdiń ortalyq zaldarynda Gala-konsert beretin biregeı áskerı-mýzykalyq ujym. Ansambl mýzykanttary men solısteriniń oryndaýyndaǵy áskerı-patrıottyq ánder elimizdegi barlyq patrıottyq sharalardyń kelbetine aınaldy. Áskerı taqyrypqa baılanysty birde-bir konsert ulandyq ónerpazdardyń qatysýynsyz ótpeıdi.
Ansambl repertýary ár alýan, onda áskerı ánder, halyq mýzykasy, estrada jáne jastar stıli, álem halyqtarynyń ánderi men bıleri bar. Ansambl quramynda erler hory, vokalshylar jáne bıshiler toby, bıg-bend, folklorlyq top jáne konserttik orkestr bar. Bıyldan bastap olardyń qataryna áskerı teatr toby qosylyp otyr.
