Táýelsizdiktiń 30 jyldyǵyna jáne oblys ortalyǵynyń Taldyqorǵan qalasyna kóshkenine 20 jyl tolýyna oraı uıymdastyrylǵan sharaǵa kelýshiler dán rıza. Kórmege «Qurmet» ordeni men «Fotoóner qaıratkeri» medaliniń ıegeri Shúkiráli Shahaı men Jýrnalıster odaǵynyń múshesi Jeńis Ysqabaıdyń jáne basqa da jergilikti fotograftardyń úsh júzge jýyq sýreti qoıylǵan. Fotosýretterde elimizdiń 30 jyl ishindegi júrip ótken joly, damý satylary, Elbasynyń qatysýymen ótken túrli tarıhı oqıǵalar, elimizdiń dańqty azamattary, tarıhı eskertkishter – bári qamtylǵan.
– Bul kórme shyn máninde el Táýelsizdiginiń 30 jylyndaǵy jetistikterdi sýret arqyly kórsetip bergen keremet shara boldy. Táýelsizdik alǵan alǵashqy jyldardaǵy dúken sóreleriniń bos qalǵan, zaýyt-fabrıkalardyń toqtap turǵan qıyn kezeńderin de, Elbasynyń bir maqsatqa jumyldyrǵan tarıhı oqıǵalaryn da, elge eńbek sińirgen qaıratkerlerdi de, tabıǵatymyzdyń keremetterin de osy fotosýretterden kórip, rıza boldyq. Qazaqstannyń, sonyń ishinde Almaty oblysynyń ósip-órkendegeni kóz aldaryńyzda ótip jatyr. Biz elimizben maqtanamyz. Osyndaı sharany uıymdastyrǵan azamattar Shúkiráli men Jeńiske kóp rahmet aıtamyn. Fotografqa ár sátti qalt jibermeıtin baıqampazdyq kerek. Búgingi kórmedegi sýretter – sondaı sheberliktiń nátıjesi. Kórme Taldyqorǵanda bir aı boıy turdy. Osyndaı sýretke basylǵan tarıhty turǵyndar men jastar kelip kórip, kóńilge túıdi degen oıdamyn, – deıdi oblys ákimi Amandyq Batalov.
Kórmede qala turǵyndary men qonaqtarynyń nazaryna jalpy sany 300 fotosýret usynyldy. Onda Qazaqstannyń táýelsizdik alǵan alǵashqy jyldarynan bastap, búginge deıingi tarıhı kezeńderi qamtylǵan. Atap aıtqanda, memlekettik Týdyń, Eltańbanyń alǵashqy nusqalarynyń Elbasyna tanystyrylý sáti, memlekettik rámizderdiń qabyldanǵan kezi, Týdyń ǵaryshqa ushyrylǵan sáti, Elbasynyń túrli halyqaralyq basqosýlarǵa qatysqan shaqtary, shetel prezıdentterimen birge túsken sýretteri, elimizge Taıqazandy alyp kelgen shaq, Tuńǵysh Prezıdenttiń Olımpıada jeńimpazdarymen kezdesýi jáne basqa da ár kúni tarıhqa aınalǵan otyz jyldyń shejiresi osy kórme barysynda áıgilendi.
Almaty oblysy
