Qoıylymnyń premerasyna Mádenıet jáne sport mınıstri Aqtoty Raıymqulova men Ulttyq ulannyń Bas qolbasshysy Rýslan Jaqsylyqov qatysty.
−Táýelsizdigimizdiń otyz jyldyǵy men qala kúnine oraı uıymdastyrylǵan «Elorda – óner ólkesi» atty Qazaqstan, О́zbekstan, Qyrǵyzstan teatrlarynyń shyǵarmashylyq kezdesýiniń ekinshi kúninde sizdermen birge Ulttyq ulan án-bı ansambliniń janynan qurylǵan jańa teatrdyń «Jeńis jalaýy» spektaklin tamashalap otyrmyz. Ekinshi dúnıejúzilik soǵys kezinde Otan úshin ot keshken atalarymyzdyń erliginen syr shertetin bul áskerı-mýzykalyq qoıylymnyń mańyzy zor. Biz sol uly jeńiske jetken babalar rýhyna taǵzym etemiz. Sol erlik dástúrin jalǵap, beıbit kúnniń saqshylary bolǵan Ulttyq ulan búginde kúndiz-túni tynyshtyǵymyzdy qorǵap keledi, − dedi mınıstr.
Talantty jas rejısser Dáýren Serǵazın qoıǵan spektaklde Ekinshi dúnıejúzilik soǵysta Berlındegi Reıhstagqa alǵashqy jeńis týyn qadaǵan Halyq Qaharmany Raqymjan Qoshqarbaevtyń erligi baıandaldy.
Ulttyq ulan Bas qolbasshysy general-leıtenant Rýslan Jaqsylyqov óz sózinde osy qoıylym arqyly jastarǵa Raqymjan aǵamyz sekildi erjúrek qazaq jaýyngerleriniń Uly jeńisti jaqyndatýǵa qosqan úlesi men olardyń maıdan dalasyndaǵy erligin dáripteý ekendigin jetkizdi. Sonymen qatar ol ansambl quramyndaǵy teatr toby Ishki ister mınıstriniń qoldaýymen ashylǵanyn, ony qurý barysynda reseılik ásker teatrynyń tájirıbesi zerttelgenin aıta kelip, «Áskerı teatrdy ashýdaǵy maqsat – pogon taqqan ártisterdiń ónerimen óskeleń urpaqty otansúıgishtikke baýlyp, áskerı qyzmetti nasıhattaý», dedi.
