Is-sharaǵa tótenshe jaǵdaılar birinshi vıse-mınıstri Ibragım Kúlshimbaev qatysty. Ol 2020 jylǵy jeltoqsanda Qazaqstanda qurastyrylǵan Mı-8AMT alǵashqy eki tikushaǵy da Qazaqstan TJM-niń paıdalanýyna berilgenin atap ótti.
Áýe kemeleri Nur-Sultan, Almaty qalalarynda ázirlikte tur. Olar Túrkistan oblysynyń taýlaryndaǵy izdestirý-qutqarý operasııalaryna, shuǵyl medısınalyq evakýasııalaýǵa, orman avıasııalyq jumystaryna jáne elimizdiń aýmaǵyndaǵy sý tasqyny qaýpi bar kezeńde aerovızýaldy barlaý jumystaryna jumyldyryldy. TJM tikushaqtar parkin tolyqtyrý «Qazaqstan ınjınırıng» UK» AQ, «№ 405 avıajóndeý zaýyty» AQ jáne «Reseı tikushaqtary» AQ arasyndaǵy úshjaqty kelisim aıasynda iske asyrylady.
Tikushaqtar TJM oryndaıtyn mindetterdi eskere otyryp qalyptastyrylǵan. Olar jolaýshylar men júkterdi tasymaldaýǵa, zilzalalar men tabıǵı apattar aımaqtaryndaǵy avarııalyq-qutqarý jumystaryna, ormandardy kúzetýge, órt sóndirýge, sondaı-aq halyqqa sanıtarııalyq avıasııa qyzmetterin kórsetýge beıimdelgen.
Tehnıka avıasııalyq qyzmetter men jumystardyń keń spektrin oryndaýǵa arnalǵan. Ol zamanaýı jabdyqtarmen, ushýdyń praktıkalyq aýqymyn 2 esege arttyratyn qosymsha otyn baktarymen jabdyqtalǵan.
Mı-8AMT modıfıkasııalanǵan áýe kemesinde ushýlardy oryndaý úshin TJM ushý jáne ınjenerlik-tehnıkalyq quramynan 18 adam (12 ushqysh jáne 6 bort-mehanık) Ulan-Ýde qalasyndaǵy «Bargýzın AK» avıasııalyq oqý ortalyǵynda ushý daıarlyǵynan ótti.
Is-shara sońynda birinshi vıse-mııstr aldaǵy ýaqytta TJ mınıstrliginiń materıaldyq-tehnıkalyq bazasyn nyǵaıtý boıynsha jumys jalǵasatynyn atap ótti. Ol tabıǵı jáne tehnogendik sıpattaǵy tótenshe jaǵdaılar kezinde qutqarý operasııalaryn júrgizýdiń tıimdiligin arttyrýǵa múmkindik beredi.
