Sońǵy úsh jylda elimizdegi respýblıkalyq mańyzy bar úshinshi qalada 853,5 shaqyrym jol tóseldi. Buryn munsha kólemdegi jol 10 jylda salynǵan, dep atap ótti shahar basshysy.
«Týra úsh jyl buryn, osy aıdyń on toǵyzynshy juldyzynda Elbasy Nursultan Ábishuly Nazarbaevtyń Jarlyǵymen Shymkentke respýblıkalyq qala mártebesi berildi. Bul tarıhı sheshim Shymkenttiń tynysyn ashty desem, artyq aıtqanym emes. Sonyń ishinde, qala bıýdjeti 131,2 mıllıard teńgeden bıyl 481,6 mıllıard teńgege jetedi dep kútilýde, ıaǵnı ósim 3,7 ese. Kásipkerlik salasynda ınvestısııa kólemi 1,9 esege ósip, 214 mıllıard teńgeden bıyl 400 mıllıard teńgege jetemiz dep otyrmyz. О́nerkásip ónim kólemi 425 mıllıard teńge bolsa, jyl sońynda 710 mıllıard teńge bolady dep kútilip otyr. Al turǵyn úıdy bir mıllıonǵa sharshy metrge jetkizýdi josparlap otyrmyz. Munyń barlyǵy sońǵy úsh jyldaǵy atqarylǵan aýqymdy jumystar», dedi Murat Dúısenbekuly.
Qala ákimi Shymkenttiń ekonomıkalyq ósimi ınfraqurylymǵa qarqyn bergenin ataı kele, 2023 jyly bul saladaǵy turǵyndardy mazalaǵan ózekti máseleler tolyq sheshiletinin jetkizdi.
Máselen, shaharda úsh jylda, bıyldy qosyp eseptegende, 18 turǵyn alaby aýyz sýǵa qosylyp, 60 myń adam sapaly aýyz sýmen qamtylǵan. 7 turǵyn alaby tabıǵı gazǵa qosylyp, 29 500 adam kógildir otynǵa qol jetkizgen.
«2023 jylǵa deıin halyq 100 paıyz sapaly aýyz sýǵa, 100 paıyz tabıǵı gazǵa, 2025 jylǵa deıin 100 paıyz sapaly elektr qýatyna qosylady» deı kele Murat Dúısenbekuly Táýelsizdigimizdiń 30 jyldyǵy qarsańynda Shymkent qalasyna erekshe qamqorlyq kórsetip kele jatqan Elbasynyń qala damýyndaǵy orasan rólin Shymshahar turǵyndary aıryqsha baǵalaıtynyn aıtty.
