Olar áskerı ushqyshtardyń ushý sheberligi deńgeıin jáne nusqaýshy quramnyń mashyǵyn arttyrý, ushý tehnıkasyndaǵy daǵdylardy jetildirý, sondaı-aq tájirıbe almasý úshin uıymdastyrylǵan.
Jıyndy qolbasshynyń birinshi orynbasary - QR QK ÁQK Áskerı-áýe kúshteri shtabynyń bastyǵy polkovnık Rýslan Kýnýrov basqardy.
Ushý tapsyrmalaryn oryndaý kezinde nusqaýshylar túngi kórý quraldaryn paıdalana otyryp táýliktiń qarańǵy ýaqytynda jergilikti jerde baǵdarlaý, taýly jerlerde ushý jáne qoný, sondaı-aq syrtqy aspada júkpen ushý sııaqty máselelerdi pysyqtady.
Ushqyshtar tikushaqpen eńister men shatqaldardan ótý tapsyrmalaryn oryndady, sondaı-aq 1500-den 4000 metr bıiktiktegi asýlardyń ústinen ótti.
«Syrtqy aspada júgi bar tikushaqty basqarýdyń birqatar erekshelikteri bar, ol júkti kabınanyń ishinde tasymaldaǵan kezdegiden de kúrdeli. Júktiń ár túri úshin onyń pishini men mólsherine baılanysty tasymaldaýdyń ózindik jyldamdyǵy bar. Ushýdyń osy túrin oryndaýdaǵy jattyǵýlar ádette salmaǵy bir tonnaǵa deıingi júkpen bastalady, júktiń massasyn birtindep maksımaldy mánge deıin arttyrady», dedi polkovnık Rýslan Kýnýrov.
Budan basqa, jıyndarda jas ushqyshtar quramyn oqytýǵa ruqsaty bar ushqysh-nusqaýshylardyń ádistemelik bilimderi tekserildi, ekıpajdardyń ushýlarǵa basshylyq jasaý tobymen ózara is-qımyl jasaý máseleleri boıynsha arnaıy sabaqtar ótkizildi. Oqý qorytyndysy boıynsha ushqysh-nusqaýshylar ár-túrli deńgeıdegi tapsyrmalardy oryndaýǵa ruqsat aldy
