Stasıonarlyq modýldik polısııa beketteriniń jumysy týraly IIM-de ótken brıfıngte tolyǵyraq maǵlumat bergen Ákimshilik polısııa komıteti tóraǵasynyń orynbasary Serik Túsipov sońǵy eki jylda el kóleminde 60-qa jýyq modýldik beket ornatylǵanyn málimdedi. Osy jyldyń sońyna deıin taǵy 36 beket ornatý josparlansa, qazirgi tańda onyń 5-ýi – Aqtóbe, 2-ýi – Soltústik Qazaqstan jáne taǵy 2-ýi Túrkistan oblystarynda ashylǵan.
«Stasıonarlyq polısııa beketteri quqyq buzýshylyqtar men qylmystyń aldyn alýǵa baǵyttalǵan patrýldik-bekettik qyzmet atqarýdyń negizgi nysany bolyp sanalady. Beketter sanyn kóbeıtýdegi basty maqsat – halyq kóp jınalatyn qoǵamdyq oryndar men krımınogendik ýchaskelerde, sondaı-aq quqyq buzýshylyq jıi tirkeletin aýmaqtarda polısııa qyzmetkerleriniń turaqty bolýyn qamtamasyz etý, sondaı-aq qoǵamdyq tártiptiń jaı-kúıin tikeleı qadaǵalaý jáne azamattardyń ótinishteri boıynsha sharalardy jedel qabyldaýdy uıymdastyrý», deıdi komıtet ókili.
Zamanaýı modýldik beketterde qyzmet atqarý men azamattardy qabyldaý úshin qajetti barlyq jaǵdaı jasalǵan. Atap aıtqanda, beket beınebaqylaý, jaryqtandyrý, jylytý, jeldetý, sý qubyry, sanıtarııalyq toraby bar káriz júıelerimen, órt-kúzet sıgnaldandyrýymen, derbes kompıýtermen jáne basqa da qajetti quraldarmen tolyqtaı jabdyqtalǵan. Budan bólek, beketterde polısııa qyzmetkerleri bolmaǵan jaǵdaıda azamattardyń IIO bólimsheleriniń kezekshi bólimderine habarlasýyna arnalǵan «shaqyrý domofony» júıesi ornatylǵan.
Polısııa qyzmetkerleri beketterde apta boıy, táýligine 24 saǵat qyzmet atqarady. Bekette kúndiz ýchaskelik polısııa ınspektory, keshke patrýldik polısııa qyzmetkerleri bolady. Alǵashqylary halyqqa yńǵaıly bolý úshin quqyq buzýshylyqtar týraly ótinishterdi qabyldasa, patrýldik jasaq beketke irgeles aýmaqtarda kósheler men qoǵamdyq oryndardy patrýldeýdi uıymdastyrady.
Nur Otan partııasynyń saılaýaldy baǵdarlamasyn oryndaý jónindegi Jol kartasyna sáıkes IIM jergilikti atqarýshy organdarmen birge aldaǵy bes jyl ishinde óńirlerde 176 modýldik beket ornatýdy josparǵa engizgen. Al qazirgi tańda respýblıkalyq mańyzdaǵy úsh qalada 64 modýldik beket jumys istep tur. Onyń 41-i Almaty qalasynda ornatylǵan.
S.Túsipovtiń aıtýynsha, qylmys statıstıkasy jaıaý patrýldeýdi biriktiretin stasıonarlyq beketterdiń óńirlerdegi qoǵamdyq tártip pen qaýipsizdik deńgeıine oń áserin tıgizgenin kórsetken.
