2022 jyly jańartylǵan esep derekterine sáıkes ósim 3,8%-dy quraıdy. QR ekonomıkasynyń bıylǵy ósý derekteri boıynsha EQDB Qazaqstan ekonomıkasynyń qalpyna kelý boıynsha ósý traektorııasyna shyqqanyn atap ótti.
Boljamdardy arttyrýdyń negizgi faktorlary naqty sektordaǵy, atap aıtqanda, ekonomıkanyń óńdeýshi salalaryndaǵy, qurylystaǵy jáne aýyl sharýashylyǵyndaǵy joǵary dınamıka, kórsetiletin qyzmetter salasynyń jekelegen salalaryndaǵy belsendilikti arttyrý, ekonomıkanyń óndirýshi emes salalaryndaǵy ınvestısııalyq qyzmetti qalpyna keltirý, sondaı-aq álemdik shıkizat naryqtaryndaǵy suranysty qalpyna keltirý boldy.
Qaıta óńdeý sektorynda ósý qarqyny osy jyldyń 5 aıynyń nátıjesi boıynsha mashına jasaýda (21,1%), onyń ishinde avtomobıl jasaýda (26,4%) jáne lokomotıvter men vagondardy qosa alǵanda ózge kólik quraldaryn óndirýde (54,9%), hımııa ónerkásibinde (9,8%), jeńil ónerkásipte (5,5%), azyq-túlik ónimderin óndirýde (3,3%), metallýrgııada (2,7%), farmasevtıkada (25,7%) jáne basqa salalardaǵy joǵary qarqyn esebinen 7,2% deńgeıinde qalyptasty.
Qurylys sektorynda (11,3%) jáne aýyl sharýashylyǵynda (3,1%) joǵary ósý qarqyny baıqaldy. EQDB sondaı-aq qyzmet kórsetý salasynyń jekelegen salalaryndaǵy ósimdi atap kórsetedi. Atap aıtqanda, bıylǵy 5 aıdyń qorytyndysy boıynsha qalpyna kelýdiń joǵary qarqyny saýdada (6,7%), baılanysta (11,6%), qarjy jáne saqtandyrý qyzmetinde (1,6%), jyljymaıtyn múlik operasııalarynda (1,3%) baıqaldy.
Negizgi kapıtalǵa salynǵan ınvestısııalardyń ósýi taý-ken óndirisin esepke almaǵanda 25,5%-dy qurady. EQDB aldaǵy kezeńderde QR ekonomıkasy ósiminiń oń faktorlary retinde Úkimettiń ekonomıkany fıskaldyq yntalandyrý jáne jeke suranysty qalpyna keltirý jónindegi sharalaryn da atap ótedi. EQDB álemdik jáne ulttyq ekonomıkalardy qalpyna keltirýdegi negizgi syn-tegeýrin pandemııanyń qaıtalaný yqtımaldyǵy dep sanaıdy.
