Máýlen Áshimbaev kezdesýdi asha kelip, tatý kórshilik, tarıhı ortaq tamyrlastyq, til men mádenıet ǵasyrlar boıy qazaq jáne qyrǵyz halyqtaryn baýyrlastyq pen dostyq qatynastarmen baılanystyryp kele jatqanyn atap ótti. Qazirgi ýaqytta Qyrǵyzstan Qazaqstannyń mańyzdy strategııalyq áriptesteriniń biri bolyp tabylady. Senat Tóraǵasy parlamenttik ózara is-qımyl qazaq-qyrǵyz qatynastaryn nyǵaıtý faktorlarynyń biri bolyp tabylatynyn atap ótti.
Máýlen Áshimbaev pen Jeenbek Kýlýbaev parlamentaralyq, áleýmettik-mádenı, saýda-ekonomıkalyq ózara is-qımyl boıynsha ekijaqty yntymaqtastyqtyń aýqymdy máselelerin talqylady.
«Osy jyldyń kúzinde Qyrǵyzstanda saılaý ótetini jáne Jogorký Keneshtiń jańa quramy qalyptasatyny belgili. Parlamenttik baılanystardaǵy yntymaqtastyqqa odan ári qarqyn berý mańyzdy dep sanaımyn. Eki eldiń ózara qarym-qatynasyn damytýǵa Parlamentter yqpal ete alatyn birqatar másele bar. Osyǵan baılanysty, parlamentaralyq qyzmetti odan ári arttyrýdyń mańyzy zor», dep atap ótti Máýlen Áshimbaev.
Máýlen Áshimbaev, sondaı-aq Belarýs Respýblıkasynyń Qazaqstandaǵy Tótenshe jáne ókiletti elshisi Pavel Ýtıýpınmen de kezdesti. Kezdesý barysynda elderimiz arasyndaǵy ekijaqty yntymaqtastyq jáne parlamenttik baǵyttaǵy ózara is-qımyl máseleleri sóz boldy.
«Keshe ǵana Qazaqstanǵa Belarýs Premer-mınıstri kelip ketti. Bul sapar ónerkásip, mashına jasaý, qurylys jáne aýyl sharýashylyǵy salalaryndaǵy ózara is-qımylmen birge ekonomıkalyq yntymaqtastyq pen kooperasııany odan ári nyǵaıtý turǵysynda asa mańyzdy boldy», dedi Máýlen Áshimbaev.
Sonymen qatar Senat Spıkeri Qazaqstan-Belarýs qarym-qatynasynyń mańyzdy baǵyttarynyń biri parlamentaralyq yntymaqtastyq ekenin atap ótti.
«Bizdiń depýtattarymyz arasynda ekijaqty jáne kópjaqty formatta tyǵyz baılanys ornady. Parlamentterimizdiń palatalary arasynda Yntymaqtastyq jónindegi komıssııa tabysty jumys istep keledi. Eki el depýtattarynyń TMD PAA, UQShU PA jáne EQYU PA alańdaryndaǵy belsendi is-áreketi parlamenttik dıplomatııanyń mańyzdy baǵyty bolyp sanalady», dedi Senat Tóraǵasy.
