Ortalyq kommýnıkasııalar qyzmeti alańynda ótken brıfıng barysynda IIM Kóshi-qon qyzmeti komıteti tóraǵasynyń orynbasary Sabyrjan Seıtjanov pen azamattyǵy joq máseleler jónindegi óńirlik keńesshi, BUU BJKB Ortalyq Azııa boıynsha ókildigi Roman Marın aýqymdy aksııanyń alǵashqy qorytyndysy jóninde jan-jaqty málimet berdi.
Aksııa nátıjesinde qujatsyz júrgenderdiń kóbi, negizinen, Almaty, Qaraǵandy, Túrkistan, Aqmola jáne Jambyl oblystarynda anyqtalǵan. IIM ókiliniń habarlaýynsha, naýqan kezinde osy azamattardyń 3408-ne jeke basyn kýálandyratyn kýálik berilse, qazirgi tańda 1278 turǵynǵa qatysty qujattandyrý máselesi aıaqtalyp qaldy.
Baspasóz máslıhatynda Kóshi-qon qyzmeti komıtetiniń ókili qujatsyz júrgenderge jeke kýálikti qalaı alýǵa bolatyndyǵy týraly aqparatty bólisti. «Azamattyǵy joq adamdardy anyqtaý jáne qujattandyrý naýqany qazir de jalǵasyp jatyr. Aksııa aıasynda múldem qujatsyz júrgen azamattar ózderiniń quqyqtyq mártebesin anyqtaý jáne jeke basyn kýálandyratyn qujat alý úshin jergilikti kóshi-qon qyzmeti bólimshelerine júgine alady», dep atap ótti spıker.
«О́mirdegi túrli jaǵdaıǵa baılanysty adamdar qujatsyz qalýy múmkin. Alaıda qandaı jaǵdaıda bolsyn kez kelgen adamnyń jeke kýáligi bolýy qajet. Onsyz eshqandaı áleýmettik kómek, járdemaqy ala almaıdy, tipti jumysqa da tura almaıdy. Qujatsyz adam ne isteý kerek? Elimizdiń barlyq aımaǵynda Kóshi-qon komıtetiniń bólimsheleri bar. Aldymen sol jerge baryp, azamat óziniń qujatsyz júrgenin aıtý kerek. Sol jerdegi mamandar ol azamattyń mártebesin anyqtap, ýaqytsha qujat bere alady. Keıinnen bul azamatqa qatysty tolyq jaǵdaı anyqtalyp, onyń nelikten qujatsyz júrgeni anyqtalǵan soń resmı túrde Qazaqstannyń azamaty ekenin dáleldeıtin jeke kýálik beriledi», dedi ol.
Al «Elimizde jeke kýáligi joq azamattar koronavırýs indetine qarsy vaksına saldyra ala ma?» degen suraqqa S.Seıitjanov jeke kýáliksiz vaksına alý múmkin emes ekenin de aıtyp ótti. «Vaksına alǵan kezde azamatqa qatysty jeke málimet bazaǵa engiziledi. Sondyqtan da kez kelgen adamnyń jeke sáıkestendirý nómiri bolýy shart. Al JSN-siz, jeke kýáliksiz vaksına alý múmkin emes. Iаǵnı ol vaksına alǵan azamattardyń esebine kirmeıdi. Sondyqtan da azamat, eń aldymen, jeke qujatyn rettegeni durys», dep túsindirdi ol.
Esterińizge sala keteıik, jeke qujatsyz júrgen azamattardy anyqtaýdy maqsat tutqan keń aýqymdy aksııa el aýmaǵynda 2020 jyldyń qazan aıynan bastap uıymdastyrylyp keledi. Is-sharaǵa uıytqy bolǵandar – IIM, úkimettik emes uıymdar, Adam quqyǵy jáne zańdylyqty saqtaý jónindegi halyqaralyq bıýro jáne «Sezim – áıelder bastamasy» quqyq ortalyǵy.
