Áskerı oqý oryndaryn bitirý rásimderine baılanysty, shildede jas ofıserler men serjanttar áskerde qyzmet atqarýǵa barady. Qolbasshylarǵa olardyń qyzmettik mindetterge beıimdelýin jáne áleýmettik máselelerin sheshýdi qarastyrýǵa nusqaý berildi.
Qarýly Kúshterde COVID-19-ǵa ujymdyq ımmýnıtet qalyptasqanyn eskere otyryp, jaýyngerlik daıarlyq sharalary tolyq deńgeıde ótkizilýi tıis. Bas áskerı-medısınalyq basqarmanyń bastyǵy jeke quramnyń 82 paıyzy ekpeniń eki komponentin alǵanyn baıandady. Sonymen qatar áleýmettik qashyqtyq pen betperde rejimin saqtaý ózekti kúıinde qalyp otyr.
Qorǵanys mınıstri Nurlan Ermekbaev eldegi sanıtarlyq-epıdemııalyq jaǵdaıǵa baılanysty óńirler ákimdikteriniń aldyn alý sharalaryna Qarýly Kúshterdi qatystyrý máselesin qaraýdy tapsyrdy. Atap aıtqanda, bul obektilerdi dezınfeksııalaýǵa, áskerı-dalalyq gospıtalderdi ashýǵa, azamattarǵa kómek kórsetý úshin medısına toptaryn qurýǵa qatysty.
Keńeste áskerdi qaıta jaraqtandyrý barysy qaraldy. Búginde áýe shabýylyna qarsy qorǵanys quraldary – basty nazarda. 2019-2020 jyldary Qazaqstan áskeriniń qarýlanýyna Reseıdiń «Býk» zenıttik-zymyran keshenderi, Belarýstiń «Rosa» radıolokasııalyq stansııalary (RLS), sondaı-aq elimizdiń áýe shepterin qorǵaýda turǵan otandyq «Nur» RLS-tary jetkizildi.
Jýyrda zamanaýı «Tor-M2K» zenıttik-zymyran keshenderin jetkizý josparlanýda. «Tor-M2K» kez kelgen úlgidegi ushaqtar men tikushaqtardy, sonyń ishinde «kórinbeıtin» tehnologııamen jasalǵan tikushaqtardy jáne ushqyshsyz ushý apparattaryn, joǵary dáldiktegi qarýdy, radıolokasııaǵa qarsy jáne qanatty zymyrandardy, basqarylatyn avıasııalyq bombalardy anyqtap, joıýǵa qabiletti.
Qazirgi ýaqytta ýákiletti organ – Indýstrııa jáne ınfraqurylymdyq damý mınıstrligi jetkizýshimen sharttar jasasý ústinde. Qorǵanys mınıstrligi atalǵan keshendi ázirlegen zaýytta otandyq ÁShQQ áskerleriniń mamandaryn oqytýdy josparlap otyr.
«Egemen-aqparat»
