Oblystyq polısııa departamenti baspasóz qyzmetiniń aqparatyna súıensek, 25 maýsymda saǵat 10:30 shamasynda 89 jastaǵy ájeıge úıiniń aldynda belgisiz bireý shabýyl jasaǵan.
«Zeınetkerdiń oń jaq qulaǵynan altyn syrǵasyn julyp alyp, oqıǵa ornynan boı tasalap, qashyp ketken. Beıtanys adamnan jábir kórgen zeınetker Atyraý qalalyq Polısııa basqarmasyna aryzdandy. Jábirlenýshige shabýyl jasaǵan kúdikti shamamen 25-30 jas aralyǵyndaǵy er adam bolǵan. Zeınetkerge keltirilgen shyǵyn kólemi 75 myń teńgeni qurady», dep habarlady departamenttiń baspasóz qyzmeti.
Polısııa qyzmetkerleri jedel izdestirý is-sharasyn júrgizip, kúdikke ilingen 31 jastaǵy er adamdy ustady. Tergeý kezinde kúdiktiniń «oljasyn» qaladaǵy «Lombard» mekemesine tapsyrǵany anyqtalǵan.
Qazir kúdiktige qatysty QR Qylmystyq Kodeksiniń 191-babynyń 1-bóligimen (Tonaý) tergeý bastaldy. Al, ustalǵan kúdikti ýaqytsha ustaý ızolıatoryna qamaldy.
