Prezıdent Shveısarııa Konfederasııasy Qazaqstannyń Eýropadaǵy mańyzdy saýda-ekonomıkalyq seriktesteriniń biri ekenin aıtty.
– Elderimiz arasyndaǵy qarym-qatynastar dostyq pen ózara senimge negizdelgen. Búgingi kezdesýdi Shveısarııa Prezıdenti Gı Parmelanmen beıne baılanys arqyly ótken jýyrdaǵy kelissózdiń konstrýktıvti jalǵasy retinde qarastyramyn. Biz saýda baılanystarymyzdy, ınvestısııalyq yntymaqtastyǵymyzdy nyǵaıtý úshin jumys isteýge, atalǵan salalar boıynsha jetistikke qol jetkizýge ýaǵdalastyq. Qazaqstan Táýelsizdigin alǵan ýaqyttan beri Shveısarııa ekonomıkamyzǵa 30 mıllıard dollarǵa jýyq ınvestısııa saldy. Eki memleket arasyndaǵy taýar aınalymy, tipti, byltyrǵy daǵdarys kezinde 1,7 mıllıard dollar boldy, – dedi Prezıdent.
Qasym-Jomart Toqaev búginde Qazaqstanda Shveısarııa kapıtalynyń qatysýymen 400-den astam kásiporyn jumys istep jatqanyna toqtaldy.
– Qarym-qatynastarymyz ben yntymaqtastyǵymyzda belgili bir jetistikter bar dep sanaımyn. Sonymen qatar muny odan ári damytý úshin áleýetimiz de jetkilikti. Qazaqstan tikeleı ınvestısııa tartý úshin elimizdegi ınvestısııalyq klımattyń meılinshe qolaıly bolýyna barlyq múmkindikti jasaıdy. Qazaqstan – aımaqtaǵy ekonomıkasy eń iri memleket. Bizdiń maqsatymyz – aımaqtaǵy jetekshilik ornymyzdy saqtap qalý. Sonymen qatar ekonomıkamyzdy ártaraptandyrýǵa baılanysty máselelerdi sheshýimiz kerek, – dedi Qasym-Jomart Toqaev.
Prezıdenttiń aıtýynsha, Qazaqstanda ekonomıkany kómirteginen ada etýge, jasyl tehnologııalarǵa, qorshaǵan orta men qarjy salasyn qorǵaýǵa baılanysty jobalarǵa basymdyq beriledi.
Kezdesý barysynda Stadler Rail AG kompanııasynyń prezıdenti, Qazaqstan men Shveısarııa iskerlik keńesiniń teń tóraǵasy Peter Shpýler, Glencore International AG kompanııasynyń bas dırektory Aıvan Glazenberg, Roche Holding konserniniń basqarma tóraǵasy Krıstof Frans, Credit Suisse Switzerland ınvestısııalyq bólimshesiniń basshysy Iens Haas, ABB Switzerland kompanııasynyń bas dırektory Robert Ichner, KS Genetics kompanııasynyń prezıdenti Fılıppo Lombardı, INOKS Capital kompanııasynyń bas atqarýshy dırektory Nabıl Abdýl-Massıh jáne Rey Group kompanııasynyń prezıdenti Krıstıan Reı sóz sóıledi.
