«Otanǵa barar jol» qandaı?

Búginde álemde Qazaqstannyń azamat­tyǵyn almaǵan, biraq ulty qazaq 5 mln-ǵa jýyq qandasymyz bar. Olardyń kóbi Qazaqstan ýnıversıtetterinde joǵary bilim alǵysy keledi. Halyqaralyq bilim berý korporasııasynyń birinshi prorektory Qaıyrjan Meńdiǵalıev oqý ornyna call-ortalyǵyna, messendjerler men áleýmettik jeli betterine shetel­dik qandas-talapkerlerden memlekettik granttarǵa qatysty kóptegen saýal kelip tús­kenin aıtty.
«Bilim jáne ǵylym mınıstrligi jyl saıyn elimizdiń joǵary oqý orynda­rynda joǵary bilim alý úshin 50 myńnan asa grant bóledi. Bul rette, Qazaqstan azamattary emes, ulty qazaq adamdar da memlekettik granttar konkýrsyna qatysa alýy úshin jaqsy jaǵdaılar jasalýda. Grant alý úshin UBT tapsyrý qajet. Keıbir tapsyrmalar elimizdiń mektep pánderinen alynǵan. Mysaly, Qazaqstan tarıhy nemese Qazaqstan geografııasy. Osyǵan baılanysty Bi­lim jáne ǵylym mınıstrligi Qazaq­stan Respýblıkasy­nyń azamattary emes, ulty qazaq adam­dar úshin 4% kvota bóledi. Biraq biraz adam ótý úshin qa­jetti upaıyn jınaı almaımyn dep qorqady. Sondyqtan Aıǵazy Qusa­ıy­nov bastaǵan halyqaralyq bilim berý korporasııasynyń Baqylaý keńesi 20 ishki grant bóldi. «Otanǵa barar jol» baı­qaýynyń jeńimpazdary bizdiń ese­bi­mizden oqyǵanyn qalaımyz», dedi Q.Meń­diǵalıev.
Baıqaý birneshe kezeńnen turady já­ne onlaın formatta ótedi. Negizgi ke­­zeńde qatysýshylar áleýmettik jeli­de ja­rııalanatyn «Qazaq halqynyń ta­rı­­hyn­daǵy kórnekti tulǵalar» jáne «Men nege Ha­­lyq­­aralyq bilim berý kor­porasııasyna túskim keledi?» taqyryp­ta­rynda beıne-esse daıyndaýy tıis. Baı­qaý qorytyndysy 26 shildede shy­ǵa­­ry­lady. Fınalda qatysýshylar on­­laın-áńgimelesýden ótedi. Baıqaý je-­
ńim­­pazdary Halyqaralyq bilim berý korpo­rasııasynda – QazBSQA jáne QAÝ joǵary oqý oryndarynda oqý­ǵa 20 ishki grant alady.
Halyqaralyq bilim berý korporasııa­synyń rektory Margarıta Imandosova sheteldik stýdentterdiń qazaqstandyq jaǵdaılarǵa jyldam beıimdelýi úshin keshendi jumys júrgizilý kerek ekenin, mundaı baǵytta oqý ornynyń tájirıbesi jetkilikti ekenin jetkizdi.
«Bul baǵyttaǵy tájirıbemiz mol. Bu­rynǵy oqý oryndarynda da sheteldik stýdentter oqyǵan. Qazirgi utqyrlyq baǵdarlamasy boıynsha da stýdentter kelip oqıdy. Búginde JOO-da 69 shetel azamaty bilim alýda. Stýdentter tarapynan týyndaǵan máselelerdi ýaqtyly ári jedel sheshýge múmkindigimiz bar. Bul úshin arnaıy bólimder (Halyqaralyq keńse men Áleýmettik damý departamenti) ashyldy. Osy bólimderdiń qyzmetkerleri stýdentterdiń máselelerin sheship berýge árdaıym daıyn», dedi M.Imandosova.
Halyqaralyq bilim berý korporasııa­sy Qazaqstannyń ózge de joǵary oqý oryndaryn úlgi alýǵa jáne bastamany qoldaýǵa shaqyrdy.
«Eger bolashaqta 129 JOO-nyń ár­qaı­­sysy 1 granttan bólse, sáıkesinshe 129 ta­lapker óz otbasylarymen birge tý­ǵan je­rinde óz bolashaǵyn tabýǵa múm­­­kindik alady. Dál osyndaı qa­dam­­dar Qazaqstanda qazaq hal­qy­­nyń ult­tyq jań­ǵyrýyna alyp ke­ledi», dedi Halyq­aralyq bilim berý kor­po­ra­sııasynyń birinshi prorektory Q.Meń­diǵalıev.
Qosa keteıik, Halyqaralyq bilim berý korporasııasy (HBK) 2007 jyly Elba­sy Nursultan Nazarbaevtyń elimizdegi bilim berý salasynyń sapasyn kóterý jáne ýnıversıtetter áleýetin arttyrý baǵytynda júrgizgen saıasaty negizin­de Qazaq bas sáýlet-qurylys akademııa­sy (QazBSQA) men Qazaq-Amerıka ýnıver­sı­tetin (QAÝ) biriktirip qurylǵan bolatyn.