Elorda saýyǵar emes

Elordada turǵyndar arasynda koro­navırýs ınfeksııasynyń ósýin mamandar eń agressıvti jáne tez taralatyn úndi shtamymen baılanys­tyryp otyr. «Sarapshylar qazirgi ýaqytta koronavırýs álemde belsendi túrde mýtasııaǵa ushyrap jatqanyn aıtady. Mysaly, «delta» shtamy buǵan deıingilerge qaraǵanda 60%-ǵa juqpaly bolyp keledi, balalar arasynda da «delta» shtamyn juqtyrý jıilep barady», dep habarlaıdy elorda ákimdiginiń resmı saıty.

Dárigerlerdiń aıtýynsha, ınfek­sııa­ny áli vaksına almaǵan adamdar juqtyrýǵa beıim keledi, sondyqtan kovıdpen kúresýdiń jalǵyz joly – jappaı egilý.

Nur-Sultanda vaksına alǵandardyń sany ótken aptalarmen salystyrǵanda bes esedeı ósip, táýligine 7 myńnan asyp otyr. Resmı málimet boıynsha búginge deıin barlyǵy 229 myńnan astam adam ekpeniń alǵashqy kompo­nentin alǵan. Degenmen bul – áli de az. Sondyqtan qalalyq ákimdik jáne mekemeler, uıymdar jurtshylyqty vaksınalaýǵa yntalandyrý úshin kóptegen shara men aksııa ótkizip jatyr. Atap aıtqanda, vaksına alǵan elordalyqtardyń arasynda jıyrma iPhone12 oınatylady. Aptasyna eki ret júrgiziletin utys oıynyna medısınalyq mekemelerde, saýda-oıyn-saýyq ortalyqtarynda vaksına alǵandar qatysa alady.

Bas qala ákimdigi saıtyndaǵy má­limetke súıensek, jeńimpaz Birge platformasyndaǵy kezdeısoq qyzmet arqyly anyqtalady. Vaksınalan­ǵandar boıynsha aqparat Densaýlyq saqtaý mınıstrliginiń málimetterimen birigedi. Servıste ekpe alǵan adam­nyń id-nómiri ǵana kórinetin bolady. Jeńimpazdy servıs kezdeısoq anyqtaıdy. Ol Facebook pen Instagram arqyly tikeleı efırde ótkiziledi.

«IPhone12 alǵashqy utys oıyny 8 shilde kúni ótedi. Alǵashqy utys oıynyna 6 shildege deıin ekpe al­ǵandardyń bári qatysa alady. Nur-Sultan qalasynda 7 shilde kúni vak­sınalanǵandardyń bazasy daıyndalady. Sonymen qatar 31 ta­myzǵa deıin egilgen azamattar arasynda eki bólmeli páterdiń utys oıyny ótkiziledi. Sol sııaqty buǵan deıin «MEGA Silk Way» SOO óziniń egý pýnktinde vak­sınanyń birinshi kom­ponentin al­ǵandar arasynda avtomobıl oınatylatynyn jarııalady. Al «Azııa Park», «Saryarqa», «Abý-Dabı Plaza», «Kerýen», «Eýrazııa» SOO-larynda jáne basqa da saýda úı­lerinde kompıýterlik, turmystyq teh­nıka, jeńildik kýpondary túrindegi túrli syılyqtar oınatylyp jatyr», de­lingen saıtta jarııalanǵan materıalda.

Ákimdik vaksınalanǵandardy yntalandyrý maqsatynda osyndaı aksııalar ótkizip jatqanda qalada karantındik sharalar úshinshi márte kúsheıdi. Resmı málimet boıynsha endi 4 shildeden bas­tap Ashyq jobasy boıynsha jumys isteıtin tamaqtaný oryndarynyń (meıramhanalar, dámhanalar) ýaqyty 02:00-den 22:00-ge deıin (jabyq jerlerde), al syrtta, ıaǵnı esik aldynda jumys isteıtin tamaqtaný oryndarynyń ýaqy­ty 02:00-den 00:00-ge deıin qys­qarady. Jeksenbi kúnderi qoǵamdyq kólik­tiń jumysy toqtatylady. Bul kúni avtobýstarǵa zararsyzdandyrý ju­mys­tary júrgiziledi. Ashyq jobasyn qoldanbaıtyn fıtnes-ortalyqtardyń (ıoga ortalyqtary, t.b.) jumysy toqtaıdy. Al Ashyq jobasy boıyn­sha isteıtin fıtnes-ortalyqtar (ıoga or­talyqtary, t.b.) dúısenbi-juma kúnderi jumys istese, demalys kún­deri jumys istemeıdi. «Qalada qatań karan­tındik sharalardy engizbes úshin ujymdyq ımmýnıtetti damytý qajet. Al ujymdyq ımmýnıtettiń úlesi 60%-dan asýǵa tıis. Medısına qyz­metkerleriniń 90%-dan astamy, al kommýnaldyq qyzmetkerlerdiń 70%-dan astamy koronavırýsqa qarsy egildi», deıdi elorda ákimdiginiń resmı saıty.