Shyntýaıtyn aıtqanda, semeılikter B.Baıahmetovtyń kelgenine qýana qoıǵan joq. Kerisinshe N.Saqtaǵanovqa senim artqan edi. Alaıda oblys ákimi baspasóz qyzmetiniń málimetinshe, Nurymbet Amanuly densaýlyǵyna baılanysty qyzmetinen ketipti. Al qoǵam belsendileri bul aýys-túıisti basqasha topshylap otyr.
B.Baıahmetovke degen senimsizdik qaıdan shyqty deısiz ǵoı. Kezinde Aıagózdiń birneshe aýylyna taza aýyz sý tartý úshin qazynadan 2 mıllıard 600 mıllıon teńgeden asa qarjy bólingen-tuǵyn. Alaıda is sońyna deıin jetken joq. Al, bul másele Baqytjan Baıahmetovtyń tusynda bastalǵan. Sol úshin de aldyńǵy jyly oblys ákiminiń orynbasary qyzmetinde júrgen B.Baıahmetovti Nur Otan partııasynyń Partııalyq baqylaý komıteti jaýapqa tartýdy usynǵan bolatyn.
Partııalyq baqylaý komıtetiniń tekseris qorytyndysy boıynsha jarııalaǵan málimetterine súıensek, myńdaǵan turǵyny bar aýyldardy aýyz sýmen jabdyqtaý jobasy tek qaǵaz júzinde iske asypty. Al merdiger uıymdar tıesili qarajatty tolyqtaı qaltaǵa basqan kórinedi. Bıýdjetten shyǵyn shyqqanymen, halyq aýyz sýǵa jarymady. Ákim mundaı bassyzdyqqa nege kóz juma qarady? Keıin oblys ákiminiń orynbasary bolǵan tusta da qadaǵalap, jumystyń tolyqtaı aıaqtalýyn nazarda ustaýy kerek edi ǵoı. Osyndaı bassyzdyqqa baılanysty Nur Otan partııasynyń Partııalyq baqylaý komıteti partııanyń óńirlik fılıaldarynyń tóraǵalaryna halyqty aýyz sýmen qamtamasyz etý úshin bólinetin bıýdjet qarajatyn jumsaý salasyndaǵy zań buzýshylyq faktilerin joıý úshin jumysty baqylaýǵa alý jóninde usynymdar joldaǵan. Sonymen qatar partııanyń tıisti aımaqtyq fılıaly saıası keńesiniń bıýrosyna burynǵy Aıagóz aýdanynyń ákimi Baqytjan Baıahmetovke jáne aımaqtaǵy basqa da partııa múshelerine qatysty partııalyq yqpal etý sharalaryn qoldanýdy usynǵan. Usynǵanymen, nátıjesi shyn máninde qalaı boldy, bizge beımálim.
Já, ótkendi tize bermeı, erteńimizdi oılaıyq. Semeıdiń máselesi shash-etekten. Kishigirim kósheleri bylaı tursyn, ortalyqtaǵy dańǵyldardyń ózi shuryq-tesik. Túngi mezgilde kóshelerdiń kóbi tas qarańǵy. Alystaǵy aýyldardyń kóshelerine jaryq tartylyp jatqanda Alash astanasy nege jetimniń kúıin keshedi? Ol ol ma, baıaǵydan beri túıini sheshilmeı kele jatqan «jasyl avtobýstar» toqtap tynǵan sııaqty. Turǵyndardyń aıtýynsha, qalaishilik baǵyttarǵa qyryq jylǵy eski-qusqy avtobýstar shyǵa bastapty. Amal joq, sýyq páterde dirdektep otyratyn halyq oǵan da kóndi. Sýyq páter demekshi, jylý júıesin retke keltirý jumystary bıyl bastalǵan. «Shójeni kúzde sanaıdy» degendeı, bir sýyq túsken soń ol jaǵy belgili bolady. Jańa ákim jany ashysa, bir jaǵynan shyǵysyp, jylý máselesin birjola sheshetin shyǵar. Jylý ǵana emes, joǵaryda aıtqandaı problema jetip artylady. Qala turǵyndarynyń, qoǵam belsendileriniń aıtýynsha, Semeı tozyp barady. Salaq adamnyń úıi sekildi. Alash qaıratkerleriniń, Abaı, Muhtarlardyń izi qalǵan rýhanı shahardyń munshalyqty aıanyshty kúıge enip bara jatqandyǵy janǵa batady. Ákimqaralardyń emes, qarapaıym halyqtyń ǵana jany aýyratyndaı.
– Qaısy birin aıtaıyn?! Eń las qala osy – Semeı. Túnde – tas qarańǵy. Joldary oıdym-oıdym. Basqasyn aıtpaı-aq qoıaıyn, M.Áýezov, Shákárim dańǵyldaryndaǵy shuńqyrlardy kórseńiz. Taǵy bir problema – jumyssyzdyq. Jańa jumys oryndary ashylǵan joq, kerisinshe jabylyp jatpasa... Baıqasańyz, jerasty ótkelderinde, bazardyń mańaıynda qaıyr tilep otyratyndar kóp. Qymbatshylyq qysyp barady, – deıdi Jazýshylar Odaǵynyń múshesi, professor Aımuhambet Beısembekov.
– Jańa Semeı jaǵynda birde-bir serýendeıtin saıabaq joq. Jutap tur. Jap-jańa avtobýstarymyz bar edi, jabylyp tyndy. Al ákimniń aýysqan sebebi – aldaǵy ýaqytta eki kópir salynady eken. N.Saqtaǵanov týra júretin basshy sııaqty edi... – dep, ol óz boljamyn astarlap jetkizdi.
Bul boljamdy áleýmettik jelide ashyq aıtyp jatqandar da bar. Anyq-qanyǵyn kim bilsin?! Biz bálen-túgen dep aıtýdan aýlaqpyz. «Halyq únine qulaq asatyn memleket» quryp jatqanymyzda áleýmettik jelide aıtylǵan ashy sózge óńir basshylary óz jaýaptaryn bere jatar. Áıtpese, basqa sharasyn qoldanar.
Biz Semeıge kelgen jańa ákim janashyrlyq tanytyp, tigisi sógilip bara jatqan qalanyń qamy úshin eńbek etse eken deımiz. Ádilin aıtý kerek, Semeıde atqarylǵan jumystar da bar. Sapasy kóńil kónshitpese de Qaraǵaıly shaǵyn aýdanyna jańa turǵyn úıler salyndy. Atshaptyrym aýmaqta arena boı kóterdi. Saıabaǵy, fontany jáne bar. Áleýmettik salany damytý maqsatynda 47 mlrd teńge bólinip, 4 mektep, 4 balabaqsha, muz aıdyny ashyldy. Múmkindigi shekteýli jandarǵa arnalǵan ońaltý ortalyǵy da salyndy. Osyndaı ıgilikti ister kóp bolsa eken. Qalaı degenmen, Abaı, Shákárimder júrgen qazaqtyń rýhanı qalasy munshalyqty súreń kúıge túspeýi kerek edi.
Iá, Semeıdi damytýǵa baǵyttalǵan jospar kóp. Eń bastysy, bólingen qarjy dittegen maqsatqa jumsalsa eken. Halyq tilegi osy.
Aıtpaqshy, 1998 jyldan beri Semeı qalasynda on ákim aýysypty. Baqytjan Baıahmetov – on birinshi basshy. Qyzmetine bilek sybana kirisse, Semeı qalasyn az ýaqyttyń ishinde jaınatatyn shyǵar.
Shyǵys Qazaqstan oblysy,
Semeı qalasy
