«Álem halyqtary jahandaný prosesiniń qarqyndy júrýine baılanysty ózderiniń ulttyq rýhanı-mádenı qundylyqtaryn jandandyrý baǵytynda túrli sharalardy júzege asyrýda. «Men qazaqsha sóıleımin» respýblıkalyq aksııasynyń ózektiligi de osy mindettermen úılesedi. Búgingideı sharalardyń negizinde memlekettik tildiń áleýmettik mártebesin joǵarylatý, memlekettik tildi rýhanı-mádenı qundylyq retinde dáripteý asa mańyzdy», dedi Til saıasaty komıtetiniń tóraǵasy Ádilbek Qaba.
Qazaqstan Respýblıkasy Táýelsizdiginiń 30 jyldyǵy aıasynda ótkizilgen bul aksııaǵa 14 etnostan 213 adam qatysyp qazaqtyń belgili aqyndarynyń týǵan el, týǵan jer taqyrybyndaǵy jyr jaýharlarynan úzindilerdi mánerlep jatqa oqydy.
Qatysýshylardyń ishinde orys ultynyń ókilderi basym – 68 qatysýshy. Odan ózge ózbek, túrik, ázirbaıjan aǵaıyndardyń belsendilikteri joǵary boldy.
Sharaǵa qatysýshylardyń basym kópshiligi Shymkent qalasy, Jambyl, Aqmola, Qaraǵandy, Pavlodar oblystarynan.
Jyl sanap tildiń maıyn tamyzyp, qazaq tilinde naqyshyna keltirip jyr oqıtyn óz ult ókilderiniń qatary kóbeıip keledi. Ásirese olardyń qazaq tilin úırenýge degen qulshynysy qýantady.
Jan-jaqty saraptaý nátıjesinde kelesi júlderi oryndarǵa laıyqtylar anyqtaldy: Bas júldeni Jambyl oblysynyń ókili Aıana Kım Farıza Ońǵarsynovanyń «Týǵan jer» shyǵarmasyn mánerlep jatqa oqyǵany úshin ıelendi. Al birinshi oryn Sabına Syhýrovaǵa, ekinshi oryn Anora Iýnýsovaǵa buıyryp, úshinshi oryndy Dılrabo Hıkmattýllaeva men Dmıtrıı Rıabokon jeńip aldy.
Yntalandyrý dıplomymen Jambyl oblysynyń sańlaqtary Karına Dakaı, Alına Alıeva, Malıka Beshly-Ogly, Tatıana Zaıseva, Shymkent qalasynyń turǵyny Sabına Abdýjapbarova, Túrkistan oblysynyń týmalary Dııara Batyralı men Zarına Gýlmamedova, Soltústik Qazaqstan oblysynan Nıkolaı Kaınov pen Roman Jolýdev, Almaty oblysynan Vıktorııa Galýzınskaıa marapattaldy.
Shákirtterin baptaǵan qazaq tili muǵalimderiniń eńbekteri de eskerýsiz qalǵan joq, olar Til saıasaty komıteti tóraǵasynyń alǵyshatymen marapattaldy.
Esterińizge sala keteıik, aksııanyń 5-8 synyp oqýshylary arasynda ótken I kezeńine 22 etnos ókilinen turatyn 326 adam qatyssa, sonyń 214-i orys ultynyń ókilderi bolatyn.
Kelesi kezeńder joǵary oqý oryndarynyń stýdentteri men eresek turǵyndar (5 shilde – 5 tamyz aralyǵynda) jáne quqyq qorǵaý, ishki ister organdarynyń qyzmetkerleri arasynda (6 tamyz – 6 qyrkúıek) ótedi.
