Búgin «Astana Finance Days» aıasynda «Astana» Halyqaralyq qarjy ortalyǵynyń quqyqtyq máseleler jónindegi jyl saıynǵy konferensııasy ótti. Shara barysynda «AHQO quqyǵy» kitabynyń resmı tusaýkeser rásimi ótti. Kitap avtory – AHQO Quqyqtyq-konsýltatıvtik keńesiniń Tóraǵasy, Koroldik advokat ári London qalasyndaǵy 3 Verulam Buildings Barristers jetekshi keńesshisi Maıkl Bler.
Kitapta qarjy ortalyǵy quqyqtyq rejıminiń qalyptasý tarıhy, ortalyq aktileriniń negizi retinde aǵylshyn quqyǵynyń tańdalýynyń sebebi, tájirıbede qoldanýy sıpattalǵan.
QR Strategııalyq josparlaý jáne reformalar agenttiginiń tóraǵasy, AHQO Basqarýshysy Qaırat Kelimbetovtiń aıtýynsha, atalǵan kitap – mundaı mazmundaǵy alǵashqy eńbek.
«AHQO qazirdiń ózinde Qazaqstanǵa óńirlik jáne halyqaralyq ınvestısııa tartý, ádil jáne táýelsiz sot tóreligin qoljetimdi etý, sondaı-aq jalpy el ekonomıkasynyń ósýin jedeldetý isinde mańyzdy ról atqarady. Kitapta osynyń bári egjeı-tegjeıli jazylǵan», dedi ol.
Tusaýkeserde AHQO Quqyq akademııasynyń Akademııalyq keńesiniń múshesi, Nursultan Nazarbaev Qorynyń atqarýshy dırektorynyń orynbasary, Qazaqstan Respýblıkasynan Eýropa Keńesiniń Venesııalyq komıssııasynyń múshesi Igor Rogov ta pikir bildirdi. Kitapty qazaqstandyq jáne sheteldik zańgerlerdiń qyzyǵýshylyǵyn týdyryp, AHQO qyzmetimen tanysqysy keletin jandar úshin tájirıbelik quralǵa aınalatynyna senimdi ekenin aıtty.
Aıta keteıik, «Astana» halyqaralyq qarjy ortalyǵy Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń bastamasymen «Bes ınstıtýsıonaldyq reformany iske asyrý jónindegi 100 qadam» Ult jospary sheńberinde quryldy.
