Qystyń qamyn jazda oılaǵan sarysýlyq sharýalar bul kúnde qaýyrt tirshilikke kirisip ketken.
Aýdan ákimi Marat Sultanǵalıevtiń agroónerkásip keshenin damytýǵa baǵyttalǵan josparynyń birinshi satysy da mal sharýashylyǵyna arnalǵan. Osy oraıda, mal azyǵyn daıyndaý, sapaly jem-shóptiń berik qoryn jasaý - basty mindet bolyp otyr. Aýdan basshysy qysqy mal azyǵynyń daıyndyǵyn tekserip, sharýa qojalyqtaryn aralady. Sharýa qojalyqtarynyń basshylarymen kezdesken ol jumys barysyn ár apta saıyn zerdelep shyǵýda. Búginde aýyldaǵy turǵyndar qora-qopsysyn jóndep, shatyrlaryn bútindep, mal azyǵyn daıyndaýǵa kirisken.
Bizge mal azyǵyn daıyndaý boıynsha atqarylyp jatqan jumystar jóninde aýdan ákimi Marat Sultanǵalıev aıtyp berdi.
«Jazdyń aptap ystyǵy ósimdik ataýlyǵa ońaı tıip turǵan joq. Osy oraıda Sarysý aýdany boıynsha shóp daıyndaý barysyna toqtalsaq, jalpy shóp shabýǵa bekitilgen alqap kólemi 34415 gektardy quraıdy. Onyń ishinde 29370 gektar shabyndyq alqap jáne 5045 gektar kópjyldyq shópter, ıaǵnı jońyshqa. Búgingi kúni 5045 gektar kópjyldyq shópter alqaby tolyq shabyldy, al tabıǵı shabyndyq alqaptyń 8020 gektary oryldy. Daıyndalǵan shóp kólemi 44528 tonna. Jumystyń oryndalýy 44.0 paıyz. Budan bólek, Shý boıynan 7100 gektar tabıǵı qamys shóbi, saı- salalar men ózen arnalary orylady. «Qystyń qamyn jaz oıla» degendeı, búginde jappaı qystyq mal azyǵyn daıyndaý jumystary aýdanymyzda qarqyndy júrgizilýde», dedi ol.
