Qazaqstan Táýelsizdiginiń 30 jyldyǵy qarsańynda Qazaqstan Respýblıkasynyń Túrkııa Respýblıkasyndaǵy Elshiliginiń uıymdastyrýymen júzege asqan is-shara 2021 jyldyń 1-3 shilde aralyǵynda Ankaranyń eń kórikti jerleri - tarıhı Estergon qamaly, Ankara qamaly, Túrkistan ǵımaraty, Túrkııa Respýbılıkasynyń Prezıdent ákimshiligi kitaphanasy jáne Túrik tarıhı murajaıynda ótti.
Ulttyq Dombyra kúni festıvaline qazaq, túrik, tatar, noǵaı, japon halyqtarynyń ókilderinen turatyn 50-den astam ónerpaz 4 aı boıy daıyndalǵan qazaqtyń kúılerin bir mezette oryndap, ankaralyqtardy ǵajap kúıge bóledi.
Ulttyq dombyra kúnine oraı mundaı aýqymdy shara shetelde alǵash ret uıymdastyrylyp otyr.
2 shildede bastalǵan Ulttyq dombyra kúni festıvali Túrkııa Respýblıkasynyń Prezıdent ákimshiliginiń Ulttyq Kitaphanasynda saltanatty konsertpen ashyldy.
Túrkııa Prezıdenttik ákimshiligi Ulttyq kitaphanasynda ótken konsertke Elshi Abzal Saparbekuly jáne Túrkııa Prezıdenttik ákimshiliginiń Ulttyq kitaphanasynyń basshysy Aıhan Týglý, Túrkııadaǵy Qarǵyzstan, Albanııa, Iran jáne Majarstan elderiniń elshileri, dıplomattary, depýtattar, túrik elinde bilim alyp jatqan stýdentter men BAQ ókilderi qatysty.
Konsertte dombyrashylarmen qatar, Qazaqstan jáne Túrkııanyń óner maıtalmandary, atap óter bolsaq, Qazaqstannyń mádenıet qaıratkeri Elmıra Shendýran, Qazaqstan jáne Mońǵolııanyń eńbek sińirgen ártisi Merýesh Bashaı, Túrkııada qazaqtyń qasıetti quralyn dáriptep júrgen Shámshigúl Júsipova men Sedat Solakoglý, Túrki dúnıesi orkestriniń mýzykanty, belgili kompozıtor Irfan Gúrdal, Maıa Ismaılova sııaqty kórikti óner ıeleri da qazaq halyq ánderin kórermenderge pash etti.
3 shildede Ulttyq dombyra kúni festıval sheńberinde Ankaranyń eń úlken «Túrik tarıhı murajaıynda» festıvaldiń aıaqtalýyna oraı saltannatty konserttik baǵdarlama ótti.
Konserttik baǵdarlamaǵa Elshi Abzal Saparbekuly, Etımesgýt aýdany ákimi Enver Dımerel, Tarıhı túrik murajaıy dırektory Ahmet Iyldyrym, Etımesgýt aýdany ákimi orynbasary Alladın Sonat, depýtattar, mádenı ortalyq jetekshileri men zııaly qaýym jáne jergilikti BAQ ókilderi qatysty.
Elshi Abzal Saparbekuly óz sózinde «Dombyra qazaqtyń ulttyq aspaby ǵana emes, halyq murasy. Qazaq qashanda dombyrany qadir tutyp, tórge ilip, baǵalaǵan. Kıeli aspaptyń qurmetine 2018 jyly Elbasynyń jarlyǵymen Ulttyq dombyra kúni bekitildi. Sonaý kóne tarıhtyń kúmbirin búgingi kúnge jetkizgen kıeli de qasıetti Dombyramyzdy órkenıetti zamanǵa saı jańǵyrta bilsek, keleshek jastarǵa ulttyq tárbıe beretin ónege bastaýy, ári rýhanı qazynasy bolary shyndyq», dep dombyra kúniniń mańyzdylyǵyna toqtaldy.
Sondaı-aq, Elshi Abzal Saparbekuly osyndaı aýqymdy sharanyń shetelde alǵash ret Túrkııada ótip jatqanyn ataı kele, uıymdastyrýshylar men qoldaý kórsetken baýyrlas túrik halqyna alǵysyn bildirdi.
О́z kezeginde Elshi Abzal Saparbekuly sharaǵa kelgen barsha qonaqtardy «Ulttyq dombyra» kúnimen quttyqtap, ulttyq ónerdi jalǵastyrý men qasıetti dombyrany serik etken ónerpazdarǵa izgi tilegin bildire kele, olardy alǵys hatpen marapattady.
