Izgi nıet oıyndary

Máskeýde ótken dodaǵa 79 memleketten kelgen 3 myńnan asa sportshy qatysty. Olar sporttyń 18 túri boıynsha saıysqa túsip, barlyǵy 187 júlde jıyntyǵyn sarapqa saldy. Bul – 10 jylǵa jýyq ýaqytqa sozylǵan úzilisten keıin Jer sharyndaǵy eki uly derjava – KSRO men AQSh quramalarynyń asa iri keshendi jarystarda alǵash ret sheberlik baıqasýy edi. Onyń aldynda amerıkalyqtardyń Máskeý Olımpıadasyna (1980 jyl) boıkot jarııalaǵany, al Keńes Odaǵy Los-Andjeleske (1984 jyl) barýdan bas tartqany belgili.

Qos júıe – sosıalıstik jáne kapıtalıstik baǵyttaǵy mem­leket­terdiń ózara tartysy al­ǵash­qylardyń paıdasyna sheshildi. Ásirese, jarys qojaıyndarynyń qarqyny kúshti boldy. KSRO qu­ra­masy 241 (118 altyn+80 kúmis+43 qola) júlde alyp, jal­py­­komandalyq esepte jeke-dara kósh bastady. Amerıkalyqtar bas­ty qar­sylastarynan kóp qa­lyp qoıdy. AQSh sportshylary 142 (42+49+51) medaldi mo­ıyndaryna ildi. Qos alpaýyttan keıingi oryndarǵa GDR (7+11+10), Rýmynııa (6+6+6), Bol­garııa (4+7+20) jáne Polsha (2+3+6) sportshylary jaıǵasty. Bul elderdiń barlyǵy da sol kezderi sosıalıstik baǵytta edi. Tek sodan keıingi satylarǵa Kanada (2+0+2), Japonııa (1+0+3), Aýstralııa (1+0+2) jáne Uly­brıtanııa men Por­týgalııa (1+0+1) jaıǵasty. Sondaı-aq bas júlde alǵandardyń qata­rynda Efıopııa men Shveısarııa (1+0+0) bar. Barlyǵy bul jarysta 32 komanda múshelerine jeńis tu­ǵy­ryna kóterilý baqyty buıyrdy.

Jekelegen sportshylar jaıynda aıtar bolsaq, gımnasshylar saıysynda Iýrıı Korolev bes altyn alyp, barsha jankúıerdiń qoshemetine bólendi. Valentın Mogılnyı men Elena Shýshýnova tórt ret teńdessiz dep tanylsa, Vera Kolesnıkova úsh márte top jardy. Kórkem gımnastıka­dan Tatıana Drýchınına dara ta­lantymen oq­shaýlandy. Myń buralǵan arý tórt jattyǵý boıynsha jeńimpaz atandy. Júzýshiler jarysynda amerıkalyq Andjela Maers pen Leslı Deland úsh retten altynnan alqa taqty. Jeńil atletterdiń 100 metrlik básekesinde Kanadanyń jelaıaǵy Ben Djonson shashasyna shań juqtyrmady. Ol ataǵy jer jarǵan Karl Lıýıstiń ózin artqa tas­tady. AQSh-tyń dańqty sprınteri qola medaldi qanaǵat tutsa, ekinshi oryndy Nıgerııanyń «qara marjany» Chıdı Ýmo ıelendi. Bıiktikke sekirýde kópshilik bolgarııalyq Stefka Kostadınova men Olga Týrchaktyń ózara tartysyn taǵat­syzdana kútti. Bul saıys al­ǵash­qysynyń paıdasyna sheshildi.

Izgi nıet oıyndarynda bir­neshe ret álemdik rekord ja­ńar­dy. Solar­dyń arasynan Ser­geı Býbkany erekshe atap ótsek, esh aıyby joq. Doneskiden kel­gen sportshy 6 metr 01 san­tımetrlik kórsetkishpen bas júl­deni qanjyǵasyna baılady. Le­nıngradtyq Vladımır Salnıkov eki ret jeńis tuǵyrynyń eń bıik satysyna kóterilýmen shektelip qalmaı, erkin tásil boıyn­sha 800 metrlik qashyqtyqty 7:50, 64 sekýndta júzip ótti. Ame­rıkalyq Djessı Djoıner-Kersı onsaıysta 7148 upaı jısa, jelkendi sporttyń jampozdary germanııalyq Mıhael Hıýbner men Estonııanyń maqtanyshy Erıka Salýmıae da álemdik rekordqa ózgeris engizdi.

Keńes Odaǵy quramasynyń jalpy esepte aıqyn jeńiske qol jetkizýine Qazaqstannyń sport­shylary da súbeli úles qos­ty. Atap aıtsaq, boksshylar báse­kesinde Igor Rýjnıkov (63,5 kılo) barlyq qarsylasyn bet qa­ratpaı utty. Jartylaı fı­nalda jerlesimiz keıinnen kásip­qoı bokstyń shoqjuldyzyna aı­nalǵan Roı Djonsty jeńse, aqtyq synda venesýelalyq An­hel Pedrosany ábden sabady. Kárim­jan Ábdirahmanov (48 kılo) pen Aleksandr Mıroshnıchenko (+91 kılo) kúmis medaldi moıyndaryna ildi. Sheshýshi tusta Kárimjan armenııalyq Nshan Mýn­chıannan utylsa, Aleksandr Qıyr Shyǵystan kelgen Vıacheslav Iаkovlevke jol berdi. Al Erik Hakimov qolaǵa qol sozdy. Dzıý­doshylar dodasynda 65 kılo salmaq dárejesinde beldesken Álı Hamhoev aldyna jan salmady. Sporttyq gımnastıkadan qoldy tirep jasaıtyn jattyǵýda Valerıı Lıýkınniń myqtylyǵy esh kúmán týǵyzbady. Sol sekildi basqa da sport túrleri boıynsha óreli ónerlerimen kózge túsken qazaqstandyqtar az bolǵan joq.

Arada tórt jyl ótken soń ekinshi Izgi nıet oıyndaryn AQSh-tyń Sıetl qalasy qabyldady. Bul jarysta KSRO men AQSh quramalary biraz tireskenimen, bul joly da komandalyq saıysta Odaqtyń órenderi ozdy. Sodan keıin de aıtýly dodanyń jalaýy taǵy úsh márte jelbiredi. Bul básekeler KSRO ydyraǵan soń (1994 jyly Sankt-Peterbýrg, 1998 jyly Nıý-Iork jáne 2001 jyly Brısben qalalarynda) ótti.