...Ár qalanyń bolady eken óz jany!
Hám
súıegi,
qany,
ary,
ojdany,
sanasy men sezimi de,
muńy da,
ordaly oıdyń ormany men sóz baǵy!
Armany men úmiti de,
Senimi,
Qasıeti men kıesi de – eń uly!
Týady olar,
О́sedi olar,
О́ledi,
Qala ómiri – halyqtardyń ómiri!
Al ólimi – órkenıetter ólimi!
Jaıaý – jalǵyz,
At ústinde – kóppiz biz!
Topyraqpyz, jelmiz, sýmyz, otpyz biz!
Saqta, Táńir,
Jazmyshty sókpedik,
Zamanaǵa til tıgizgen joqpyz biz!
«Bar bol!» dediń...
Biz bar boldyq,
О́rledik,
Sher de keshtik,
Ker de keshtik,
О́lmedik.
Malymyzdyń sanyn – dalamen ólshedik,
Balamyzdyń basyn sanap kórmedik.
Aıbatymyz – syrtqa,
Ishke – qaıraty,
Halyq boldyq,
Qazyqqa at baıladyq.
Qobyz arshyp,
qońyr dombyra hám jebe
jondyq,
Qylysh qaıradyq.
Saqta, Táńir,
Álhamdýlláh, kóppiz biz!
Dombyramyz, aldaspanbyz, oqpyz biz!
Dáýirlerdi tejemedik,
Joımadyq,
Adamzatqa zııan qylǵan joqpyz biz!
Súıdik bárin!
Baýyr destik,
Ataly
Sózge qonaq,
Turaq berdik bataly.
Anamyzdyń baýyry – keń jaılaýdaı,
Atamyzdyń qyryq kósh jer shapany.
Jer betinen joıylýǵa shaq qalyp,
Turǵanda da,
Amanatty aqtadyq.
Qýǵyn kórdik – qanymyzdy buzbadyq,
Atyldyq biz – arymyzdy saqtadyq.
Bir qyranǵa qaıran qylmas kóp quzǵyn,
Shetin ketpeı, shekten shyqpaı, shep buzdym!
Bizdiń tarıh ardan ǵana turady,
Uıalatyn eshteńemiz joq bizdiń!
Saqta, Táńir!
Saqpyz,
Ǵunbyz,
Túrkimiz,
Turanda ósken tulpar tektes turqymyz!
Er Tońǵanyń,
Tonykóktiń,
Tumardyń,
Áz Táýkeniń,
Abylaıdyń jurtymyz!
Sóz kıesin,
Oı salmaǵyn,
Jyr qunyn,
Qasıetin bildik dala ǵurpynyń,
Kóshpendiniń qara shańyraǵymyz,
Otanymyz úsh júz mıllıon túrkiniń!
Qonys qarap,
Qansha qala turǵyzdyq,
Kóshin bastap,
Kerýenin júrgizdik.
Dushpandardy taltańdatyp qashyrdyq,
Dosymyzdy alshańdatyp kirgizdik!
Qaq mańdaıda Haq Táńirdiń oty bar,
Tańdaıymda – túrkilerdiń daty bar!
Taraz,
Saıram,
Balasaǵun,
Almatý,
Súıab,
Saýran,
Saraıshyq pen Otyrar –
Qala salǵan babalardyń shyraǵy,
Tún ǵasyryn jaryq etip turady.
Kók kesene,
Túrkistan men
Syǵanaq,
Bozoq,
Sútkent – tarıhymnyń tumary!
Sodan beri qansha dáýir almasty,
Qansha kezeń kezeńderge jalǵasty.
Qansha qala qum kóshkende – jutylyp,
Qansha kitaphanalardy shań basty!
Saqta, Táńir,
Saqpyz,
Ǵunbyz
Túrkimiz,
Dáshti Qypshaq,
Din Islamnyń kirtimiz!
Ál-Farabı,
Iаssaýı,
Hám Mahambet,
Buqar,
Abaı,
Jambyldardyń jurtymyz!
Ber Táńiri!
Táńir bergen tekti jurttyń dalasyn,
Altaı menen Atyraýdyń arasyn,
Alataý men Shyńǵystaýdyń arasyn,
Keń jaılaǵan kúlli qazaq balasyn,
Qosatyndaı bir bıik,
Ǵasyrlardyń ishte ketken nalasyn,
Ǵasyrlardyń ishten bitken jarasyn,
Dostardyń da alasyn,
Dushpannyń da tabasyn,
Basatyndaı bir bıik,
Dúnıege ár qazaqtyń kesimin,
Dúnıege ár qazaqtyń sheshimin,
Dúnıege ár qazaqtyń esimin,
Dúnıege ár qazaqtyń esigin,
Ashatyndaı bir bıik
Qala týdy!
Ǵasyrlardy jaryp shyqqan jan jaıly,
Qarańǵyny qaryp shyqqan tań jaıly,
Qara qazaq – qaıyspaǵan nar jaıly,
Hám
Ar jaıly dastan edi bul qala!
Kókirekten tarqatylǵan sher jaıly,
Kókiregin qalqan qylǵan er jaıly,
Jarasynan endi aıyqqan jer jaıly,
Hám
Suńǵyla el jaıly dastan edi bul qala!
Ár ǵasyrǵa bir-bir taýdan jıdyryp,
Ár jyldarǵa bir bórene ıdirip,
Ár kúnderge bir-bir kirpish quıdyryp,
Ár saǵatqa bir shatyryn japtyryp,
Ár mınýtqa bir-bir shege qaqtyryp,
Árbir sáti daıyn turǵan sap quryp,
Týdy daǵy óse berdi gúl qala,
Ár sát saıyn Báıteregi yrǵala,
Ár qazaqty aınaldyrar tulǵaǵa,
Tulǵalyqtyń dastany edi bul qala!
Saqta, Táńir!
Álhámdýlláh, kókpiz biz!
Báıterekpiz, Samuryqpyz, doqpyz biz!
Kózimizdi joǵary ustaý úshin de,
Sózimizdi tómen aıtqan joqpyz biz!
Pań Astana,
Patsha Astana,
О́r bolǵan,
Myńjyldyqtyń qolyndaǵy mór bolǵan,
Alty qurlyq saltanaty ózinde,
Alty alashqa tór bolǵan,
Aqyn qala,
Appaq qala,
Áz qala,
Kerbezdene, boı túzeıdi nazdana,
Alty qurlyq ańsary bir ózinde,
Alty alashqa táj qala!
Bıik qala,
Bekzat qala,
Baq qala,
Sen – astana ǵunǵa, túrki, saqqa da,
Alty qurlyq nazary bir ózinde,
Alty alashqa taq qala!
Ber, Táńiri!
Qala týdy!..
Týady,
Týady áli zamanalar shýaǵy,
Turady áli –
Bir qalanyń ózinde –
Otyz mıllıon uly qazaq turady!..
Turady áli,
Turan – eldiń bir aty,
Quzar shyńǵa qol sozatyn qulaty,
Men armanshyl bir bala edim,
Armanym –
Úsh júz mıllıon Er Túrkiniń muraty!..
