Teatr dırektorynyń orynbasary Nurgúl Qumarqyzynyń aıtýynsha, Túrkııanyń Antalııa qalasynda ótken HI halyqaralyq teatr festıvaline álemniń ár elinen 24 óner ujymy qatysypty. Sonyń biri – Mahambet atyndaǵy akademııalyq qazaq drama teatry. Atyraýlyq ártister festıvalge qazaqtyń kórnekti jazýshysy, dramatýrg Rahymjan Otarbaevtyń «Jalǵyzdyq» dramasyn usyndy. Rejısseri – Muqanǵalı Tomanov.
Bul qoıylymnyń basty keıipkeri – bala kúninde anasyn joǵaltqan er adam. Eseıgen shaǵynda da aıaýly anasynyń aıaly alaqanyn, aq jaýlyqty beınesin saǵynady. Toqsan mınýttyq spektaklde bala júreginiń túkpirinde saqtalǵan anaǵa degen saǵynysh pen ańsaýdyń muńy shertiledi. Osynyń bári teatr ártisteri Beket Zınýllın men Gúlden Kósherbaevanyń basty rólderdi somdaýdaǵy sheberliginen baıqalyp turdy.
– Halyqaralyq festıval aıasynda óner kórsetken teatrlarǵa arnaıy júldeli oryndar berilgen joq. Biraq dramatýrgter men rejısserler 24 óner ujymynyń arasynan tórt teatrdyń sahnalyq qoıylymyn úzdik dep tanydy. Bular – Ankaradan, Antalııa men Ispanııadan qatysqan óner ujymdarymen birge Mahambet atyndaǵy akademııalyq qazaq drama teatry. Onyń ishinde bizdiń teatrdyń ártisteri sahnalaǵan «Jalǵyzdyq» qoıylymy «Eń úzdik spektakl» atalymyn ıelendi, – deıdi Nurgúl Qumarqyzy.
Atyraý oblysy
