«Saǵat 08:30-da Ulytaý aýdanynyń Pıoner aýylyna keldim. Aýyldan 10 shaqyrym jerde aýmaǵy 700 metrge jýyq shaǵyn órt oshaǵyn sóndirý boıynsha jumystar júrgizilýde. Turǵyndar úshin eshqandaı qaýip-qater joq. Atalǵan aýylda tótenshe jaǵdaı zardaptaryn joıý boıynsha shtab quryldy», dep habarlady óziniń feısbýk paraqshasynda óńir basshysy.
Qazirgi tańda bul eldi mekende quramynda 89 adam bar qutqarý bólimsheleri, jergilikti turǵyndar arasynan 103 erikti jáne órtke qarsy erikti negizdegi qurylymdardyń 43 múshesi táýlik boıy jumys isteýde.
Pıoner aýylyndaǵy jaǵdaımen tanysqannan keıin, Jeńis Qasymbek órt qorshaýynda qalǵan Sheńber aýyldyq okrýginde boldy. Munda Qostanaı oblysy jaǵynan shyqqan dala órtiniń taǵy bir oshaǵy tirkelgen bolatyn. Oblys basshysy habarlaǵandaı, oqıǵa ornynda órt sóndirýshiler jáne orman sharýashylyǵynyń qyzmetkerleri jumys isteýde. Eldi-mekenge tónip turǵan qaýip joq.
Sondaı-aq, oblys ákimi Amangeldi aýyldyq okrýgindegi jaǵdaımen áýege kóterilip, ushaq ústindetanysqanyn, qazir mundaǵy órt oshaǵynyń tolyqtaı sóndirilgenin habarlady.
Jalpy, Ulytaý aýdany boıynsha barlyǵy altyórt oshaǵy baqylaýǵa alynǵan. Onyń ishinde tórt dala órti jáne eki órt oshaǵy bar. Sátbaev qalasy mańyndaǵy órt oshaǵy sóndirildi. Al Borseńgir aýylynyń mańyndaǵy órt oshaǵyn óshirý jumystary aıaqtalýǵa jaqyn.
«Qaýipti ýchaskelerdi joıý úshin qajetti kúshter men quraldar jetkilikti. Jezqazǵan jáne Sátbaev qalalarynan ákimdikter 20 tonna kóleminde janar-jaǵarmaı men azyq-túlik jetkizýdi uıymdastyrdy», dep málimdedi J.Qasymbek.
Qaırat ÁBILDA,
«Egemen Qazaqstan»
Qaraǵandy oblysy
