«Qaırat» – «Makkabı» (Haıfa)
Shveısarııanyń Non qalasynda tartylǵan Chempıondar lıgasynyń birinshi kvalıfıkasııalyq kezeńiniń jerebesi boıynsha «Qaırat» ekinshi jyl qatarynan Haıfanyń «Makkabıimen» kezdesetin boldy. Almatynyń komandasy byltyr Izraıl klýbymen Eýropa lıgasynyń birinshi irikteý kezeńinde jolyǵyp, syrt alańda 2:1 esebimen jeńilip qalǵan bolatyn. Pandemııaǵa baılanysty byltyrǵy básekelerde tek bir ǵana match ótkizilgen edi.
1913 jyly qurylǵan «Makkabı» Izraıl chempıonatynda 12 márte bas júldeni oljalady. Ol bıylǵy maýsymnyń qorytyndysy boıynsha óz eliniń teńdessiz klýby dep tanyldy. El kýbogy jolyndaǵy jarysta alty ret top jardy. «Makkabı» – Izraıl fýtboly tarıhyndaǵy ÝEFA Chempıondar lıgasynyń toptyq kezeńinde óner kórsetken tuńǵysh komanda (2002/2003). Sol jarysta ol jeti upaı jıyp, úshinshi orynǵa taban tiredi. Eýrododadaǵy eń úzdik kórsetkishi – Kýbok ıegerleri kýbogynyń (1998/1999) shırek fınaly jáne ÝEFA kýbogynyń (2006/2007) 1/8 fınalyna deıin jetýi. Bul kúnderi Barak Bahar jattyqtyratyn komanda negizinen jergilikti fýtbolshylardan jasaqtalǵan. Sondaı-aq «Makkabıdiń» sapynda Aýstralııa, AQSh, Gambııa, Nıderland, Serbııa, Kamerýn, Ispanııa, Sýrınam sekildi memleketterdiń de ókilderi bar.
Qazaqstandyq fýtbol sarapshysy Sergeı Volgın Vesti.kz ınternet basylymyna bergen suhbatynda «Qaırat» qıyn qarsylasqa tap bolǵanyn, almatylyq ujymnyń kelesi kezeńge ótý múmkindigi az ekenin aıtqan edi.
– «Makkabı» – birinshi irikteý kezeńinde «Qaıratqa» túsýi múmkin bolǵan eń yńǵaısyz qarsylastyń biri. Bul týraly men byltyrǵy jerebe tartý rásiminen keıin de aıtqan bolatynmyn. Statıstıkaǵa qaraıtyn bolsaq, Izraıl klýby «Qaırattan» basym bolyp turǵanyn baıqaımyz. Biraq statıstıkany kez kelgen ýaqytta buzýǵa bolady. Qarymta kezdesýdiń Almatyda ótetini «Qaıratqa» azdaǵan ústemdik syılaıdy, – degen edi ol.
Al sport jýrnalısi Aıdyn Qojahmet almatylyq ujymnyń bul joly «Makkabıden» basym túsetinine senimdi. Onyń aıtýynsha, «Qaırat» Izraıl klýbtarymen búginge deıin birneshe ret oınap, olardy ábden jattap alǵan. Sondyqtan byltyrǵy el chempıondary bul joly qarsylastarynyń osal tusyn tabady. «Makkabı» men «Qaırat» arasyndaǵy qarymta kezdesý 14 shildede Almatydaǵy Ortalyq stadıonda ótedi.
«Astana» – «Arıs»
Alty jyldan beri tek Chempıondar lıgasynyń irikteý kezeńinde óner kórsetip júrgen elordanyń «Astana» klýby byltyr el chempıonatynda kúmis júlde alǵandyqtan ÝEFA Konferensııa lıgasynda baq synaıtyn bolady. Jerlesterimiz atalǵan týrnırdiń ekinshi irikteý kezeńinde Grekııanyń «Arısimen» kezdesedi.
«Arıs» byltyrǵy Grekııa Sýperlıgasynda «Olımpıakos» jáne PAOK klýbtaryn alǵa jiberip, úshinshi oryn ıelengen bolatyn. 1914 jyly qurylǵan klýb búginge deıin óz eliniń úsh dúrkin (1928, 1932 jáne 1946) chempıony sanalady.
О́tken maýsymda «Arıs» qola júlde oljalap, 40 jyldan keıin alǵash ret júldegerler qatarynan kórindi. ÝEFA-nyń klýbtyq reıtınginde 237-orynda tur, al «Astana» qazirgi ýaqytta 64-satyǵa ornalasqan. Biraq eki komandanyń transferlik baǵasy shamalas. Máselen, elordalyq klýbtyń jalpy quny – 15,95 mıllıon eýro bolsa, «Arıs» fýtbolshylary 15,7 mıllıon eýroǵa baǵalanǵan.
«Arıs» klýbynda 2015/16 jylǵy maýsymda «Lestermen» birge Anglııa chempıony atanǵan Ioan Benalýan oınaıdy. Komandada kóbine sheteldik legıonerler dop tebedi. Al klýbta barlyǵy segiz grekııalyq fýtbolshy oınaıdy.
Elordalyq ujym byltyrǵy maýsymdaǵy sátsizdikten tıisti qorytyndy shyǵaryp, bıyl el chempıonatynda táýir oıyn kórsetip júr. Qazaqstandyq fýtbol mamany Bolat Esmaǵambetovtiń aıtýynsha, «Astana» úshin «Arıs» qıyndyq týdyrmaýy múmkin.
Eki ujym arasyndaǵy birinshi oıyn 22 shildede elordada, qarymta kezdesý 29 shildede Grekııada ótedi.
«Tobyl» – «Haıdýk»
ÝEFA Konferensııa lıgasynyń ekinshi irikteý kezeńinde Qostanaıdyń «Tobyly» Horvatııanyń «Haıdýk» klýbymen kezdesedi. Byltyrǵy el chempıonatynyń kúmis júldegeri Eýrokýbok básekesinde eń qıyn qarsylasqa tap boldy. Degenmen «Haıdýk» sońǵy eki jylda Eýrododa oıyndarynda kózge túse almaı júr. Chempıonattaǵy jaǵdaıy da asa máz emes. Eń keıingi ret 2005 jyly Horvatııa chempıony atanǵan. Al byltyr 60 upaı jınaǵan «Haıdýk» týrnır kestesinde 4-orynǵa taban tiredi.
Horvatııalyq klýbtyń transferlik quny «Tobyldan» úsh ese joǵary. Transfermarkt málimeti boıynsha, «Haıdýk» fýtbolshylarynyń baǵasy – 31,43 mıllıon eýroǵa baǵalanǵan. «Tobyl» klýbynyń baǵasy – 11,78 mıllıon eýro.
«Haıdýk» qazaqstandyq klýbpen alǵash ret kezdeseıin dep turǵan joq. Horvatııalyq klýb buǵan deıin 2014/15 jylǵy Eýropa lıgasynyń irikteý kezeńinde Qaraǵandynyń «Shahterimen» oınap, eki matchtyń qorytyndysy boıynsha (4:2, 3:0) kelesi kezeńge shyǵyp edi.
Eki ujym arasyndaǵy birinshi oıyn 22 shildede Horvatııada, qarymta kezdesý 29 shildede Qostanaıda ótedi.
«Shahter» – «Stıaýa»
Bıyl «Shahter» araǵa jeti jyl salyp alǵash ret Eýrokýbok oıyndaryna qatyspaq. Jerebe qorytyndysy boıynsha, Qaraǵandynyń komandasy Býharesttiń «Stıaýasymen» kezdesedi. Dál qazir fýtbol mamandary Eýrokýbok týrnırine qatysyp jatqan qazaqstandyq komandalardyń ishinde eń qıyn qarsylas «Shahterge» tústi dep otyr.
«Stıaýa» byltyrǵy Rýmynııa chempıonatynyń sońǵy segiz oıynynyń tek bireýinde ǵana jeńiske jetken. Biraq quram boıynsha «Shahter» qarsylasynan áldeqaıda álsiz bolyp tur. Máselen, Transfermarkt.com «Stıaýa» klýbyn 30 mıllıon eýroǵa baǵalap otyr. Al «Shahter» fýtbolshylarynyń baǵasy – 6,4 mıllıon eýro.
Bolat Esmaǵambetov «Shahterdiń» kelesi kezeńge shyǵý múmkindigin 20 paıyzǵa baǵalap otyr. Aıta keteıik, eki klýb arasyndaǵy birinshi kezdesý 22 shildede Rýmynııada, qarymta kezdesý 29 shildede Qaraǵandyda ótedi.
