Lýıs Enrıke basshylyǵyndaǵy Ispanııa quramasy toptyq kezeń oıyndaryn súreńsiz ótkizgen bolatyn. E tobyndaǵy alǵashqy eki oıynda Shvesııa (0:0) jáne Polshamen (1:1) teń oınap, sońǵy týrda ǵana Slovakııany (5:0) iri eseppen jeńdi. Osylaısha úsh oıynda 5 upaı jınaǵan Pıreneı túbegi eliniń ókilderi topta ekinshi orynmen pleı-off kezeńine joldama aldy.
Al 1/8 fınaldyń ekstra-taımynda Horvatııa quramasynan 5:3 esebimen basym túsken bolsa, shırek fınalda osy chempıonattyń jańalyǵy sanalǵan Shveısarııany match sońyndaǵy penaltı serııasynda jeńdi – (3:1). Esterińizde bolsa, Shveısarııa pleı-off kezeńinde 2018 jylǵy álem chempıondary – Fransııany jarys jolynan shyǵaryp jibergen edi.
Roberto Manchını jattyqtyratyn Italııa quramasy bolsa, toptyq kezeńniń ózinde-aq bıylǵy chempıonattyń negizgi favorıti ekenin birden ańǵartty. Sebebi «Skýadra adzýrra» toptyq oıyndarda 100 paıyzdyq nátıjemen kelesi kezeńge shyqqan bolatyn. Birinshi jáne ekinshi týrda Túrkııa men Shveısarııa quramalarynyń qaqpasyna jaýapsyz úsh goldan salsa, sońǵy týrda Ýelsti 1:0 esebimen utyp, 9 upaımen pleı-offqa joldama alǵan-dy.
1/8 fınalda Aýstrııany qosymsha taımda jeńse (2:1), shırek fınalda chempıonattyń bas júldesinen úmitker sanalǵan Belgııa quramasyn úıine qaıtardy – 2:1.
«Ýemblıde» ótken jartylaı fınal oıynyna toqtalar bolsaq, kezdesýdiń alǵashqy 10 mınýtynda Ispanııa fýtbolshylary 2012 jylǵy matchty eske túsirip jiberdi. «Qyzyl fýrııa» ókilderi birneshe mınýt boıy dopty óz baqylaýynda ustap, qarsylastaryna múlde dop bergen joq. Biraq Italııa fýtbolshylary jyldam ózderine kelip, keıinnen Ispanııamen teń dárejede oınaı bastady. Tipti oıynnyń 45-mınýtynda ıtalııalyqtardyń esepte alǵa shyǵatyn tamasha múmkindigi bolǵan. Alaıda Emersonnyń tepken doby qaqpa baǵanynan keri qaıtty. Birinshi taım 0:0 esebimen aıaqtaldy.
Ekinshi taım Ispanııanyń azdaǵan basymdyǵymen bastalsa da, kezdesýdiń birinshi golyn ıtalııalyqtar soqty. 60-mınýtta Roberto Manchını shákirtteri kezekti qarsy shabýyldy tıimdi paıdalanyp, Federıko Kezanyń goly arqasynda esep ashty. Alaıda 80-mınýtta qosalqy quramnan alańǵa shyqqan Alvaro Morata tarazy basyn teńestirip ketti – 1:1.
Negizgi ýaqytta da, qosymsha taımda da jeńimpaz qurama anyqtalmaǵan soń, match penaltı serııasyna ulasty. Bul synda ıtalııalyqtardyń joly boldy – 4:2.
«Skýadra adzýrra» Ispanııa men Brazılııanyń rekordyn jańartýǵa taǵy bir qadam jasady. Iаǵnı ıtalııalyqtar qatarynan 33 match eshkimge jeńilmeı kele jatyr. Qazirgi rekord – 35 oıyn. Osylaısha Italııa quramasy óz tarıhynda tórtinshi márte Eýropa chempıonatynyń fınalyna shyqty. 1968 jyly chempıon atansa, 2000 jáne 2012 jyldary kúmis júldeni qanaǵat tutqan bolatyn.
Italııa men Ispanııa quramalarynyń statıstıkalaryna kóz júgirter bolsaq, eki ujym osymen qatarynan tórtinshi chempıonatta bir-birimen kezdesti. Buǵan deıin olar Eýro-2008, Eýro-2012 jáne Eýro-2016-da baq synaǵan.
2008 jyly Aýstrııa men Shveısarııada uıymdastyrylǵan dop dodasynda Ispanııa men Italııa shırek fınalda kezdesip, «Qyzyl fýrııa» fýtbolshylary match sońyndaǵy penaltıde jeńiske jetken bolatyn (4:2). Al fýtbolda tıkı-taka júıesi óziniń jemisin berip turǵan 2012 jyly Ispanııa sol jylǵy dodanyń fınalynda Italııany 4:0 esebimen jeńip, qatarynan ekinshi ret Eýropa chempıonatynyń qos qulaqty kýbogyn jeńip alǵan edi. Odan keıin eki quramanyń joly Fransııada ótken 2016 jylǵy Kári qurlyq básekesiniń 1/8 fınalynda túıisti. Sol matchta Italııa 2:0 esebimen jeńiske jetip, kelesi kezeńge joldama alǵan bolatyn. Mine, tórtinshi oıynnan keıin Italııa tarazy basyn teńestirdi.
