QR Ishki ister mınıstrliginiń resmı saıtynda habarlanǵandaı, Saryaǵash aýdandyq PD kezekshi bólimine jergilikti turǵyn belgisiz bireýler úıine kirip, altyn zattar men 11 myń AQSh dollary salynǵan seıfti urlap ketkenin aıtyp, aryzdanǵan.
– Polısııa bul faktini QR Qylmystyq kodeksiniń 188-baby, «Urlyq» boıynsha biryńǵaı tizilimge tirkedi. Jábirlenýshige keltirilgen zalaldyń jalpy somasy shamamen 10 mıllıon teńgeni qurady, – delingen habarlamada.
Jedel-izdestirý is-sharalary barysynda ýchaskelik polısııa qyzmetkerleri jergilikti turǵyndar – kúdikti eki aǵaıyndy azamatty ustady. Olardyń bireýi buryn sottalǵan bolyp shyqty.
– Tergeý barysynda anyqtalǵandaı, kúdiktiler úıde adamdar bolmaǵan kúndi kútken, sodan keıin qorshaýdan sekirip, tereze arqyly úıdiń ishine túsedi. Urylar jatyn bólmedegi seıfti urlap, oqıǵa ornynan qashyp ketken. Sodan keıin aýyldyń shetinde seıfti buzǵan. Ishindegi altyn buıymdar men aqshany alyp, seıfti laqtyryp jiberedi. Olar urlanǵan múlikti satyp, aqshany óz qajettilikterine jumsaǵan.
Qazirgi ýaqytta atalǵan fakt boıynsha sotqa deıingi tergeý amaldary júrgizilýde. Kúdiktiler qamaýǵa alyndy. Ustalǵandardyń basqa da osyǵan uqsas qylmystarǵa qatystylyǵy anyqtalýda, – delingen habarlamada.
