34 jastaǵy Djokovıchtiń osy mejege jetkenine eshkim tańdana qoımaǵany ras. Sebebi, ol búgingi tańdaǵy álemniń birinshi raketkasy. Onyń ústine, serbııalyq sańlaq buǵan deıin dál osy týrnırde bes ret bas júldeni oljalaǵan. Sondaı-aq, «Úlken dýlyǵa» sanatyndaǵy basqa da jarystarda san márte teńdessiz dep tanyldy.
Al Berrettınıdiń ondaı tolaǵaı tabystarymen maqtana almasy anyq. Desek te, sońǵy kezderi ol da óreli oıyn órneginmen kózge túsip júr. Álemdik reıtıngte 8-orynda turǵan 25 jastaǵy Appennın túbeginiń túlegi osy týrnırde argentınalyq Gıdo Pelıa, nıderlandtyq Botık van de Zandshýll, slovenııalyq Alıaj Bedene, belarýssııalyq Ilıa Ivashko, kanadalyq Felıkas Oje-Alıasım jáne polshalyq Hýbert Hýrkachty qapy qaldyrdy. Shynyn aıtý kerek, olardyń eshqaısy da úzdikter sanatynda emes. Biraq fınalda Matteo Berrettınıdiń dańqty Novak Djokovıchke áli jetpedi. Aqtyq saıys 6:7, 6:4, 6:4, 6:3 esebimen tórtkúl dúnıeniń teńdessiz tennısshisiniń paıdasyna sheshildi.
Eske sala ketsek, «Ýımbldonnyń» erler saıysynda Qazaqstannyń eki oıynshysy ǵana óner kórsetti. Olar – Aleksandr Býblık pen Mıhaıl Kýkýshkın. Alǵashqy aınalymda qos jerlesimiz ózara kúsh synasyp, alǵashqysy jeńiske jetti. Odan keıin bolgarııalyq Grıgor Dımıtrovty utqan Býblık úshinshi kezeńde polshalyq Hýbert Hýrkachqa ese jiberdi.
