SQO saılaý komıssııasynyń tóraǵasy Tilegen Qaskınniń aıtýynsha, aýyl ákimderiniń saılaýyna túsýge 237 kandıdat tirkelse, sonyń 74-i saıası partııalardan, 163 adam – ózin-ózi usynýshy. Bir orynǵa shamamen 3 adam talaspaq.
Qyzyljar aýdany Býgrovoe aýyldyq okrýginde 5 kandıdat tirkeldi, 61 saılaý okrýginde - 3, 9 okrýgte 4 kandıdattan bar.
«237 kandıdattyń qujattary ýákiletti organdarmen zańdylyqqa tekserildi, olardyń 223-iniń qujattary sáıkes keledi. Tekseristiń qorytyndysy boıynsha 14 kandıdatqa ári qaraı saılaýǵa qatysýǵa ruqsat berilmedi. Jalpy 237 kandıdattyń 70-i – áıel, bul barlyq kandıdattardyń 29,5%-y. 110 kandıdat – memlekettik qyzmetshi, sonyń ishinde 43-i aýyl ákimi bolyp jumys isteıdi. 13-i – kommersııalyq qurylymnyń ókili, 88-i – bıýdjettik uıymnyń qyzmetkerleri, 6-ýy – ýaqytsha jumys istemeıdi», deıdi Tilegen Qaskın.
Kandıdattardyń bireýi - «Bolashaqtyń» túlegi.
Sondaı-aq kandıdattardyń ishinde ekonomıster, zańgerler, ustazdar, aýyl sharýashylyǵy qyzmetkerleri bar. Saılanýshylardyń ortasha jasy – 41. Eń jasy – 27-de bolsa, eń eresegi – 62-de.
«Bir kandıdat óz erkimen qujattaryn aldy. О́ńirde eki kandıdattan az aýyldyq okrýg joq. Áli kandıdattar tirkelip jatyr.
Bul prosess 14 shilde, saǵat 18.00-ge deıin jalǵasady. Tirkeý aıaqtalǵannan keıin kandıdattar úgit-nasıhat jumysyn bastaıdy. Ol 24 shildege deıin jalǵasady. Bul maqsatqa aýdandyq mańyzdaǵy qala ákimine kandıdatqa – 230 myń teńge, aýyldyq okrýg ákimine kandıdatqa 220 myń teńge beriledi», deıdi oblystyq saılaý komıssııasynyń tóraǵasy.
