«2019 jyly elge kóship kelgen qandastardyń beıimdelýine, járdemdesý jáne sheteldegi otandastarǵa aqparattyq-konsýltasııalyq qyzmet kórsetý maqsatynda «Qandastardy aqparattyq qoldaý ortalyǵy» qurylǵan bolatyn. Ortalyq qyzmeti «Baılanys ortalyǵynan» jáne oblystardaǵy «Front-keńselerden» turady. Qandastarymyz «Otandastar qory» birińǵaı aqparattyq ortalyǵynyń 1404 telefon nómerine tegin qońyraý shalyp, keńes ala alady», dedi Maǵaýııa Sarbasov Ortalyq kommýnıkasııalar qyzmetinde ótken baspasóz máslıhatynda.
Onyń aıtýy boıynsha, 2019-2021 jyldyń maýsymyna deıin qandastar men shetelde turatyn etnıkalyq qazaqtardan barlyǵy 11 myńǵa jýyq ótinish kelip tústi. Onyń 95 paıyzy qanaǵattandyrylǵan.
«Kelip túsetin suraqtardyń kópshiligi qujattandyrý, tirkeý, bilim alý, áleýmettik jáne basqa da máseleler. Odan bólek, atajurtqa qonys aýdarýǵa bel býǵan qandastarǵa Erulik.kz veb-portalyndaǵy aqparat ta tolyq qoljetimdi», dep túsindirdi M. Sarbasov.
Aldaǵy ýaqytta qandastarǵa qatysty is-sharalar týraly aqparat taratýǵa qoldaý kórsetý jáne mádenı-gýmanıtarlyq baılanystardy nyǵaıtý maqsatynda «Otandastar Qory» janynan «Sheteldegi qazaq tildi BAQ qaýymdastyǵyn» qurý josparlanýda.
