Oblystyq saılaý komıssııasynyń tóraǵasy Álibek О́mirálıev apta sońyna deıin aýyl ákimdigine 230 úmitker tirkelgenin málim etti. Onyń 76-sy saıası partııalar usynǵan úmitker bolsa, 154-i – ózin ózi usynǵan.
Saıası partııalar men jeke azamattardyń ózin ózi usynýy boıynsha úmitkerlerdiń tirkelýi 14 shildege deıin jalǵasatynyn eskersek, bul san óse túseri anyq. Aýyldyń ahýalyn jaqsarta túsý maqsatynda naqty baǵdarlamasy bar azamattar úmitker retinde dodaǵa túsýge bel baılap otyr degen senim turǵysynan aıtsaq, ákim bolǵysy keletinderdiń kóptigi qýantady, árıne. Al saılaýshylar – aýyl turǵyndary bilimdi, sanaly, eldiń qamyn oılaıtyn azamattardy tańdap, saılaıtyn kez kelgenin aıtyp jatyr.
«Memleket basshysy Qasym-Jomart Toqaev «Jańa jaǵdaıdaǵy Qazaqstan: is-qımyl kezeńi» Joldaýynda aýyl ákimderin tikeleı saılaýdy engizý qajettigi jóninde bastama kótergeni málim. Sondaı-aq Prezıdent aýyl ákimderin saılaý máseleleri jóninde keńeste birqatar mindet júktedi. El tarıhyndaǵy aıtýly beles dep aıtýǵa bolatyn tarıhı mańyzy bar saıası naýqan – biz úshin strategııalyq máni aıryqsha mindet. Tuńǵysh ret azamattarymyz jergilikti atqarýshy bıliktiń basshysyn tikeleı saılaý múmkindigine ıe bolmaq. Memleket basshysy Qazaqstan halqynyń 40 paıyzdan astamy aýylda turatynyna toqtalyp, bul saıası shara, eń aldymen, aýyl turǵyndarynyń múddesi úshin jasalyp jatqanyn jetkizgenin bilesizder. Bul saılaýda qolynan is keletin, naǵyz abyroıly azamattar saılansa deımiz. Aýyl ákimi – tek kresloda otyratyn adam emes. Ol búkil turǵynnyń máselesin júgirip júrip sheshetin óte jaýapty, janashyr azamat bolýy kerek», dedi oblys ákimi О́mirzaq Shókeev Maqtaaral, Shardara jáne Jetisaı aýdandarynyń aqsaqaldarymen kezdesýde.
Eldi mekenderdegi mundaı saıası doda 2013 jyly bastalǵany málim. Tórt jyldan keıin, ıaǵnı 2017 jyly tamyzda 14 oblystaǵy aýdandyq mańyzy bar qalalar, aýyldyq okrýgter, aýyldyq okrýgtiń quramyna kirmeıtin kentter men aýyldar ákimderi jergilikti máslıhattar arqyly saılanǵan. Keshegi Ońtústik Qazaqstan, búgingi Túrkistan oblysynyń aýyldarynda saılanǵan ákimderdiń birqatary áli kúnge deıin aýyldastarynyń seniminen shyǵyp, abyroıly qyzmet atqarýda. Mysaly, Tólebı aýdany Kıelitas aýyldyq okrýginiń ákimi, Keles aýdanynda 3 aýyldyq okrýg ákimi, Saryaǵash aýdanynda 1 kent, 7 aýyldyq okrýgi ákimderi 2013 jyldan beri abyroımen qyzmet etip júr. Degenmen túrli sebeptermen, sonyń ishinde quqyqbuzýshylyqqa jol berip, qyzmetinen bosatylǵan ákimder de az emes.
Oblystyq saılaý komıssııasynyń málimetine qaraǵanda, óńir aýmaǵynda jyl saıyn aýyl okrýgteriniń ákimderi saılanyp otyrǵan. Naqtyraq aıtsaq, 2017 jyly kezekti saıası dodada 119 aýyl ákimi tórt jyl merzimge saılanǵan. Al 2018 jyly – 35, 2019 jyly – 45, 2020 jyly 49 aýyl ákimi saılanǵan. Iаǵnı saılaý ótkizýde tájirıbe bar, biraq bul jolǵy saılaýdyń jóni bólekteý. Jergilikti turǵyndar atqarýshy bıliktiń basshysyn tikeleı saılaý múmkindigine ıe bolmaq. Saılaýshylar aýyl ákimi bolýǵa bel býǵan búgingi úmitkerler mundaı senimge ıe bolý úlken mártebe jáne qıyn da kúrdeli mindetti minsiz atqaryp, aýyldastaryna adal qyzmet etý zor jaýapkershilik júkteıtinin jaqsy biledi degen oıda.
Túrkistan oblysy
