«Azamattar Qazaqstan Ulttyq Bankine nomınaly 1000 teńgelik «Kúltegin» estelik banknottaryn keı dúken qabyldamaǵanyn aıtyp, shaǵymdanyp jatady. Bul kýpıýralardyń áli de zańdy tólem quraly ekenin esterińizge sala ketkim keledi. Olardy basqa da estelik banknottar sekildi bank operasııalary men aýdarymdar kezinde jáne tólemniń kez kelgen túri boıynsha qabyldaýǵa mindetti. Mundaı banknottardy qabyldaýdan bas tartqan jaǵdaıda Ákimshilik quqyq buzýshylyq týraly Kodekstiń 206-babyna sáıkes ákimshilik jaýapkershilik qarastyrylǵan», dedi D.Daýtova.
Basqarma basshysynyń aıtýynsha, atalǵan banknottardy qabyldamaǵan jaǵdaıda ony beınejazbaǵa túsirip nemese jazbasha negizdeme jazyp, Ulttyq Banktiń aýmaqtyq fılıalyna júginýge bolady. Ol banknottar tabıǵı tozyǵy jetkende ǵana aınalymnan alynady.
Aıta keteıik, baspasóz habarlamasynda «Kúltegin» túrki jazba eskertkishine arnalǵan nomınaly 1000 teńgelik banknot, Ulttyq valıýta – teńgeniń 20 jyldyǵyna arnalǵan 20 000 jáne 5 000 teńgelik banknot, QR táýelsizdiginiń 25 jyldyǵyna arnalǵan 10 000 teńgelik banknot, QR táýelsizdiginiń 20 jyldyǵyna arnalǵan 10 000 teńgelik banknot, 2011 jylǵy Qazaqstandaǵy 7-qysqy Azııa oıyndaryna arnalǵan 2 000 teńgelik banknot, QR «Islam konferensııasy» uıymyna tóraǵalyq etýine arnalǵan 1 000 teńgelik banknot, QR 2010 jyly Eýropadaǵy Qaýipsizdik jáne yntymaqtastyq uıymynda (EQYU) tóraǵalyq etýine arnalǵan 1 000 teńgelik banknot saýda aınalymdary men aýdarymdar úshin jaramdy ekeni jazylǵan.
Estelik banknottardyń tolyq tizimi, sondaı-aq Ulttyq Bank fılıaldarynyń mekenjaıy men baılanys derekteri týraly aqparat QUB saıtynda ornalasqan.
