Alǵashynda uıymdastyrýshylar oıyndy tamashalaýǵa myńdaǵan adamǵa ruqsat berý máselesin qarastyrǵan-dy. Alaıda ýaqyt óte kele álemde indettiń jańa túrleri paıda bolyp, juqtyrǵandar sany kóbeıgen saıyn Olımpııa oıyndaryn kórermensiz ótkizý máselesi qoldaý tapty. Japonııanyń premer-mınıstr Iosıhıde Sýga ótken aptada Tokıo Olımpıadasynyń qaýipsizdigin qamtamasyz etý úshin baryn salýǵa ýáde berdi.
«Men qaýipsizdikti qamtamasyz etý úshin qoldan kelgendi jasaımyn, sonyń ishinde shekaradaǵy baqylaý sharalary da nazarda bolady. Bul oıyndardy qaýipsiz ótkizý Úkimettiń moınynda ekenin birneshe qaıtara aıttym», dedi premer-mınıstr Sýga.
Olımpııa oıyndaryn uıymdastyrýshylar ótken aptada is-shara kórermensiz ótetinin jarııalaǵan. Buǵan Tokıoda 22 tamyzǵa deıin kezekti tótenshe jaǵdaıdyń jarııalanýy sebep bolyp otyr. El astanasynda indet juqtyrǵandar sany kóbeıgendikten, bılik ókilderi osyndaı qatań shara qabyldaýǵa májbúr bolǵan. Osylaısha, Japonııa úkimeti Olımpııa oıyndarynda, jazǵy demalys maýsymynda jáne tamyzdyń ortasynda toılanatyn Bon merekesinde halyqtyń el ishinde saparlap, ári-beri qozǵalysyn azaıtýdy kózdeıdi. Bul – eldegi pandemııa bastalǵaly tórtinshi tótenshe jaǵdaı. Halyq ishinde narazylyq bildirgender de az emes. Máselen, Kyodo agenttigine suhbat bergen turǵyndar arasynda indettiń taǵy órship ketýine alańdap, qatań sharanyń qanshalyqty tıimdi ekenin suraqqa alǵandar bar. Dese de bılik ókilderi otandastaryn túsinistik tanytyp, birlese áreket etýge shaqyryp otyr.
Al birneshe jyl asyǵa kútken is-sharany tamashalaı almaıtyn kórermenderdiń kóńil kúıi aıtpasa da túsinikti. Sheteldik týrısterdiń kelý-kelmeýi ekitalaı ekeni o bastan belgili bolǵanymen, jergilikti turǵyndar úshin áli de múmkindik bar edi. Oǵan qosa, búkil álem tamashalaıtyn Olımpııa oıyndaryna demeýshilik bildirgen kompanııalardyń da bul jańalyqqa asa máz bolmaǵany belgili. О́ıtkeni olardyń kóbi halyq toly sport saraılarynda óz taýarlaryn ne qyzmetterin jarnamalaýǵa kelisken.
Tipti oıyndy qaıta shegerip, keıinge qaldyrsa bolmas pa edi degender de bar. Qalaı bolǵanda da, osynshama qıyndyq pen kedergige qaramastan ótkeli jatqan eń mańyzdy sport merekesine sanaýly kún qaldy.
Japonııanyń daıyndyǵyna keler bolsaq, Halyqaralyq Olımpıada komıtetiniń basshysy Tomas Bah seısenbide Tokıony pandemııa saldarynan týyndaǵan qıyn jaǵdaıǵa qaramastan, Olımpııa oıyndaryn ótkizýge «daıyndyǵy eń myqty» uıymdastyrýshy qala retinde atap ótti. Ol óz sózinde japon halqyn is-sharanyń barlyq qaýipsizdik sharasyn saqtaı otyryp ótetinine, sondaı-aq indetpen kúreste eń qatań sharalardyń qabyldanyp jatqanyna senimdi bolýǵa shaqyrdy. «Bizdiń ortaq maqsatymyz – oıyndy qaýipsiz ótkizý, sol jolda birlese áreket etemiz», dedi HOK basshysy.
Japonııanyń densaýlyq saqtaý mınıstri: «Eger Olımpıadada indettiń taralýy údemese – onyń sátti ótkeni», degen pikirde. Ol turǵyndarǵa jarystardy úıden tamashalaý qajettigin eskertti.
Oıyndardyń kórermensiz ótýi – mańyzdy sheshimderdiń biri ekeni sózsiz. Oǵan Eýropadaǵy fýtbol jarysynan keıin koronavırýstyń «Delta» shtamyn juqtyrǵandar sanynyń kóbeıgeni týraly habarlar áser etken bolýy múmkin. Sebebi Danııa, Fınlıandııa, Reseı, Shotlandııadaǵy naýqastardyń osy jaryspen baılanysy bary anyqtalǵan. Osylaısha, Úndistanda tabylǵan jańa shtamm álemge tarap ketti. Alaıda onyń qaıda, kimnen, qalaı juqqanyn zerttep otyrý múmkin emes. Sol sebepti, japon bıligi halyqtyń densaýlyǵyna qaýip tóndirmes úshin tórt jylda bir keletin iri jarysty barynsha qatań jaǵdaıda ótkizýge bel baılap otyr.
