Tótenshe jaǵdaıǵa oraı 1 mlrd 936 mln teńge bólinetini habarlanyp otyr. Onyń bir bóligi oblystyq bıýdjettiń rezervinen berilse, qalǵany respýblıkalyq bıýdjetten qaralady. Bul týraly óńirlik kommýnıkasııalar qyzmetinde ótken baspasóz konferensııasynda Aral aýdanynyń ákimi Serik Sermaǵanbetov málimdedi.
Aýdan basshysy óńirdegi jaǵdaı jan-jaqty zerdelengenin atap ótti. Qýańshylyqqa baılanysty aýdandaǵy aýyldyq okrýgter 3 aımaqqa bólinip, tizbesi ázirlengen. Búginde aýdanǵa 205 822 bas malǵa qajetti 184 640 tonna jem-shóptiń 2190 tonnasy jetkizilipti. Aýdan aýmaǵynan 35 myń tonnadan asa shóp jınaý kózdelse, ózge óńirlerden 146 myń tonna mal azyǵyn aldyrý qarastyrylyp otyr.
Aýdan jastarynan 14 jasaq qurylyp, olar shóp orý naýqanyna óz úlesterin qosýda. Olar qazir Qazaly aýdanynyń Qarasheńgel, Kólaryq okrýginde, Qarmaqshynyń Jańajol aýylynda jáne Syrdarııa aýdanyndaǵy N.Ilııasov, Shirkeıli aýyldarynyń shabyndyqtarynda eńbek etip jatyr. Sonymen qatar 11 shilde kúni kórshiles Aqtóbe oblysynyń Yrǵyz aýdanyndaǵy jergilikti sharýashylyq ókilderimen kezdesýde shóp baǵasyn qoljetimdi etýmen qatar, shabyndyq jerlerdi orýǵa kelisim jasaldy.
– Aldaǵy ýaqytta Syrdarııa ózeniniń boıyndaǵy jaıylymdyq, shabyndyq, egistik alqaptaryn sýlandyryp, Aqshataý, Qamystybas kólderin tolyqtyrý úshin 8 kanal tazalanbaq. 49 uńǵymanyń 15-in iske qosý josparlanyp otyr. Shóp tasymalyna ketetin janar-jaǵarmaı shyǵyndary da esepke alyndy. Aýdanda kúnniń kúrt ysyp, shóptiń shyqpaýynan qumdy daýyl kúsheıip, keıbir joldar jabylyp qalǵan. Áleýmettik nysandardyń qum astynda qalý faktileri kezdesip jatyr. Bulardy retke keltirý de is-shara josparyna engizildi, – deıdi Serik Saǵıtjanuly.
Aýdanda qýańshylyq kesirinen 559 mal ólgeni anyqtalǵan. Qaýipsizdik sharalaryn kúsheıtý úshin sýattar men kól jaǵalaýlaryna eriktiler kómegimen kezekshilik uıymdastyrylyp, SALL-ortalyǵy iske qosyldy. Sondaı-aq maldy badamen baǵý jolǵa qoıylyp, veterınarlyq toptar aýrý maldarǵa tegin emdeý júrgizdi. Osyndaı sharalar mal ólimin toqtatýǵa septigin tıgizip otyr.
Qyzylorda oblysy
